Raundi ya 24 VPL - Haya ndiyo Matokeo na Msimamo baada ya Mechi zilizopigwa April 11, 2018.

Haya ndiyo matokeo ya Mechi zote za VPL zilizopigwa April 11, 2018.

Timu ya soka ya Majimaji ambayo ilikuwa ikikamata mkia katika msimamo wa ligi, leo ikiwa ugenini, imefanya maajabu kwa kuitandika Stand United mabao 3-1 katika mchezo wa Ligi Kuu Tanzania Bara uliopigwa kwenye dimba la Kambarage, Shinyanga.

Katika mchezo huo, mabao ya Majimaji yamefungwa na Peter Mapunda, aliyefunga mabao mawili, na lingine likifungwa na Lucas Kikoti huku bao la Stand United likifungwa na Tariq Seif.

Matokeo hayo yanaifanya Majimaji FC kufikisha pointi 19 na kupanda hadi nafasi ya 15 ikiiacha Njombe Mji yenye pointi 18 mkiani, wakati Stand United ikiwa nafasi ya 11 ikiwa na pointi 25.

Katika viwanja vingine, Mwadui FC imeibuka na ushindi wa mabao 2-1 dhidi ya Lipuli FC kwenye dimba la Mwadui Complex, mkoani Shinyanga.

Mabao ya Mwadui yamefungwa na Salim Hamis na Awadh Juma, huku bao la Lipuli likifungwa na Zawadi Mauya.

Jijini Mbeya Tanzania Prisons wameshindwa kuutumia vizuri uwanja wao wa nyumbani wa Sokoine baada ya kulazimishwa sare ya kufungana bao 1-1 na Kagera Sugar.

Wageni Kagera Sugar walikuwa wa kwanza kupata bao kupitia Atupele Green mnamo dakika ya 3 ya mchezo na ikabidi wenyeji Prisons wasubiri mpaka dakika ya 83 ili kusawazisha kupitia nyota wao Mohamed Rashid.

Mbao FC kwa upande wake baada ya kukosa ushindi kwenye mechi saba mfululizo za ligi hiyo, imeibuka na ushindi wa mabao 2-1 dhidi ya Njombe Mji, mchezo ukipigwa dimba la CCM Kirumba jijini Mwanza.

Mabao ya Mbao yamefungwa na David Mwasa na Rajesh Kotecha, huku bao la Njombe waliokuwa wa kwanza kufunga, likitiwa nyavuni na David Obash.

MSIMAMO WA LIGI ULIVYO SASA.

Raundi ya 24 itakamilika Alhamisi ya Aprili 12, 2018 kwa michezo minne ambapo Mtibwa Sugar baada ya kupoteza kwa Simba bao 1-0 , watawakaribisha Ndanda FC katika Dimba la Manungu Complex Morogoro.

Katika viwanja vingine Stand United watapambana na Majimaji FC katika dimba la Kambarage Shinyanga, vinara Simba watawakaribisha Mbeya City kwenye Uwanja wa Taifa jijini Dar es Salaam na Ruvu Shooting watajaribu kuendeleza mtindo wa kupapasa dhidi ya Azam FC.