Waziri Membe na Tamko la Tanzania kuhusu Ushoga asema utamaduni wetu na sheria zetu hazitambui ndoa ya jinsia moja.

Spika wa Bunge la Muungano Bi. Anne Makinda.

Katika kikao cha Bunge la Bajeti kinachoendelea hivi  sasa mjini Dodoma, Waziri wa Mambo ya Nje na Ushirikiano wa Kimataifa Benard Membe alilazimika kusimama na kutoa majibu kwa swali lililoulizwa na Mbunge wa Konde,Bw. Khatibu Said Haji (CUF) aliyetaka kujua msimamo wa Tanzania kuhusu suala la kuridhia ndoa za watu wa jinsia moja hasa baada ya shinikizo la nchi wahisani kuwa awtasitisha misaada kwa nchi zitakazoweka vikwazo kwa watu wa kundi hilo.

Akijibu swali hilo Bw. Membe ameelezea msimamo wa Tanzania, amesema  sheria ya ndoa ya mwaka 1971 inatafsiri ndoa kuwa ni muungano wa hiari kati ya mwanamume na mwanamke wenye lengo la kudumu katika maisha ya wawili hao. 

Akasema suala la msingi ni kuwa, kulingana na matakwa ya sheria ya Tanzania ili kuwepo na ndoa inayotambulika kisheria ni lazima kuwepo na pande mbili za jinsia tofauti, yaani mwanamume na mwanamke.

“Dini zetu zote za hapa nchini hazikubaliani na uwepo wa ndoa za jinsia moja na viongozi wake wapo kwenye mstari wa mbele kukemea jambo hili,” alisema Membe.

Waziri wa Mambo ya Nje na Ushirikiano wa Kimataifa Benard Membe.

Akasema utamaduni wetu na sheria zetu hazitambui ndoa ya jinsia moja. Akasema muungano kati ya watu wa jinsia moja, yaani mwanamume na mwanamume mwingine au mwanamke na mwanamke mwingine hautambuliki kama ndoa kisheria nchini Tanzania. 

Katika swali la nyongeza, Haji pia alitaka kujua ni mikakati gani Tanzania imejiwekea endapo nchi hizo wahisani zitasitisha misaada yao kwa nchi hii, kutokana na msimamo wake ambapo Membe alisema fursa za kiuchumi ambazo zimeendelea kuibuliwa nchini ni moja ya mikakati ya Serikali kuhakikisha kuwa inajitegemea kiuchumi badala ya kuzitegemea nchi wahisani. 

Alitoa mfano wa gesi iliyovumbuliwa katika mikoa ya Kusini kuwa ni moja ya nguzo ya uchumi ambayo Tanzania itaitumia ili iweze kujiendesha kiuchumi mara nchi wahisani waking’ang’ania sharti hilo la kuruhusu ushoga. Membe akasema rasilimali hizo na nyingine zikitumiwa vizuri hakuna taifa ambalo litaichezea Tanzania hovyo  hovyo kwa kuwapa masharti ya ajabu.

 

Bendera  ya  Taifa  ya Tanzania. 

Waziri Membe amesema itakapotokea wahisani wanasitisha misaada kwa sababu ya msimamo wa Tanzania wa kupinga ndoa za jinsia moja, Watanzania wako tayari kujifunga mikanda na kujibeba wenyewe badala ya kukubali kudhalilishwa utu na utamaduni wao.

Membe ameliambia Bunge kuwa Tanzania itaendelea kupokea misaada ile tu ambayo haina masharti ya kubadili sera, utamaduni na sheria za nchi kuhusu ndoa za jinsia moja.

“Nchi marafiki duniani zikiwemo zile za Magharibi, zimeendelea kutuheshimu kutokana na msimamo wetu huo thabiti na usiotetereka kwa kuendelea kutoa misaada ya ushirikiano wa kiuchumi kwa Serikali ya Tanzania,” alisema Membe.