UCHAGUZI:-Hii ndio Safu Mpya ya Uongozi CHADEMA mkoani Kigoma ....ISOME HAPA.

Chama cha Demokrasia na Maendeleo CHADEMA, Mkoani Kigoma, kimepata uongozi mpya wa chama hicho kufuatia uongozi uliokuwepo awali kujiuzulu na kuhamia chama cha Allience For Change and Transparency (ACT – Tanzania).

Mkurugenzi wa Mafunzo na Uchaguzi wa CHADEMA, Benson Kigaila, ambaye alikuwa msimamizi wa zoezi la kupatikana kwa viongozi hao alisema mkutano mkuu wa mkoa ambao ulihusisha majimbo yote nane ya mkoa wa Kigoma uliwaweka viongozi wapya kwenye nafasi zilizokuwa wazi.

Bw.Kigaila aliwataja viongozi waliochaguliwa ambao watashika madaraka hayo hadi uchaguzi utakapofanyika kwa mujibu wa katiba Agosti 30 mwaka huu kuwa ni Ally Kisala ambaye ni Diwani wa Mwandiga aliyechaguliwa kuwa Mwenyekiti mpya wa Chadema Mkoa wa Kigoma.

Mkurugenzi wa Mafunzo na Uchaguzi wa CHADEMA, Benson Kigaila akizungumza na waandishi wa habari (hawapo pichani). (Picha na Maktaba).

Alisema kuwa mkutano mkuu wa mkoa ulikuwa na mamlaka yote ya kuamua kuchagua uongozi kwa ajili ya kuendesha chama kipindi ambapo kuna baadhi ya viongozi wametoka.

Aliyechaguliwa kuwa Katibu wa Mkoa wa Kigoma, alimtaja kuwa ni Shabaan Madebe wakati nafasi ya Mratibu wa Baraza la Wanawake wa mkoa huo (BAWACHA), ilichukuliwa na Vestina Luhihi.

Omary Gindi alichaguliwa kuwa Mratibu wa Baraza la Vijana mkoa wa Kigoma wakati Jeremia Misigara alichaguliwa kuwa Mratibu wa Baraza la Wazee.

“Tumefanya pia uchaguzi wa viongozi wa Jimbo la Kigoma mjini ambako Mwenyekiti aliyechaguliwa ni Khalfani Bona na Katibu wake ni Frank Luhasha.

“Katibu Mwenezi ni Idd Ngesha na Mratibu wa Wazee ni Yassin Mapigo wakati Amfua Athumani ni Mratibu wa BAVICHA,” alisema Kigaila.

Kwa mujibu wa Kigaila, viongozi hao waliochaguliwa wanatakiwa kuanza kazi mara moja na jukumu lao kuu ni kukifanya Chadema Mkoa wa Kigoma kizidi kusonga mbele.

“Tumeshawahoji hawa makamanda mmoja mmoja kama kazi hiyo tuliyowapa ya uongozi wataifanya kwa moyo wao wa kujitolea bila ya malalamiko nao wametuahidi hawatatuangusha.

“Pia nimewaambia wafanye kazi kwa moyo wa kujitolea na siyo kuwa ndani ya chama nusu nusu yaani mguu mmoja ndani na mwingine nje,” alisema Kigaila.

Akizungumzia chama kipya cha ACT, alisema hakijaleta madhara mkoani Kigoma dhidi ya Chadema.

Mwenyekiti mpya wa Mkoa Kigoma, Ally Kisala, alisema pamoja na mkoa huo kuwa na changamoto nyingi za siasa, atashirikiana na viongozi wenzake kukiimarisha chama chao.

Julai 18,2014 waliokuwa viongozi wa CHADEMA, Mkoa wa Kigoma ambao ni Mwenyekiti Jafari Ramadhani Kasisiko,Msafiri Husein Wamalwa,Katibu, na Malunga Masoud Simba, Katibu wa Baraza la Wanawake Chadema, BAWACHA, walitangaza kujiuzulu nyadhifa na uanachama wa CHADEMA.

Walisema walichukua hatua hiyo baada ya kuona kuwa CHADEMA kimepoteza sifa ya kuwa chama cha kidemokrasia na kuwa chama cha kibabe.

 UKIONA TUKIO LOLOTE LINATOKEA USISITE KUTUTUMIA PICHA KUPITIA WhatsApp:- 0789-925-630.

Like ukurasa wetu wa facebook  ili habari ziwe zinakuijia punde tu zinapoweka kwenye mtandao huu BONYEZA HAPA