MAUAJI NGARA:-Afisa mtendaji wa kijiji cha Nyamahwa wilayani Ngara mkoani Kagera auwawa kwa kupigwa na kitu kizito.

Baadhi ya Wananchi wa Wilaya ya Ngara mkoani Kagera wakiwa na Nyuso za Huzuni baada ya kushuhudia tukio la Kujinyonga/Kuuawa kwa Wapendwa wao,Matukio ambayo yamezidi kuitikisa Wilaya hiyo huku hatua za kuyadhibiti zikisuasua.Picha Na:-Maktaba Yetu.

Afisa Mtendaji wa Kijiji cha  Nyamahwa ,kata ya Nyakisasa wilayani Ngara mkoani  Kagera  ameuwawa kwa kupigwa na kitu kizito kichwani  na watu wasiofahamika,kisha mwili wake kuutelekeza  karibu na Ofisi ya kijiji hicho.

Kaimu  Afisa tarafa ya Rulenge,  Bw  Elick  Eliazari  amemtaja  afisa huyo kuwa ni  Andrew Mwakuye (54) na kwamba alihamishiwa Kijijini hapo akitokea kijiji cha Kanazi miezi sita iliyopita.

Bw Eliazari  amesema ,  tukio hilo  limetokea Usiku wa kuamkia Julai 22,2014 na mwili wake kuonekana asubuhi  huku wauwaji hao wanadaiwa kutochukuwa fedha elfu 27  alizokuwa nazo Marehemu pamoja na simu yake mkononi.

Aidha Mganga mkuu wa hospital ya Rulenge ,wilayani Ngara   ambaye amefanya uchunguzi wa mwili wa marehemu, Padre  Frorence  Muchunguzi  amesema kuwa  Marehemu alipigwa na kitu kizito kichwani  na kupelekea kuvuja damu nyingi na kupoteza maisha.

Katika tukio Jingine,Mtoto mmoja aliyejulikana kwa  jina la Scovia   Stafford  mwenye umri wa miaka  13 mkazi wa kitongoji cha Nyakariba B, kata ya Kasulo wilayani humo,  ameuwa  baada ya kuchomwa mkuki   ubavuni   na watu wasiojulikana.

Akizungumza na Radio Kwizera FM, Baba wa mtoto huyo Bw. Stafford Patrisi amesema kuwa  tukio hilo limetokea Julai 20,2014, majira ya saa nne usiku ambapo alirudi kutoka sokoni na alipofika nyumbani  majira  ya saa 4 usiku alikuta nyumba imeungua  na mtoto wake amefariki.

Bw. Patrisi  amevitaja vitu vilivyougulia ndani ya nyumba kuwa ni  gunia mbili za mahindi , gunia moja la maharage,  pesa taslimu  shilingi  elfu 40 pamoja  na vyombo   na nguo ambapo ametaja thamani ya vitu hivyo kuwa ni  shilingi  laki mbili na elfu kumi.

Mwenyekiti wa  kitongoji cha Nyakariba B, Bw. Damiani  Joseph  amesema   chanzo cha tukio ni mgogoro wa ardhi baina ya wakulima na wafugaji  wa kitongoji  hicho uliodumu kwa  takribani wiki mbili zilizopita.

Mkuu wa Jeshi la Polisi wilayani Ngara ,Bw Abeli Mtagwa amesema Jeshi hilo linawasaka wahusika wa Matukio hayo ili wafikishwe mbele ya vyombo vya sheria na kuiomba Jamii kutoa ushirikiano ili kupunguza vitendo hivyo vya Mauaji.

Habari Na:-Radio Kwizera-Ngara.