Takribani Watu Bilioni Saba Duniani hawamjui Mungu wa Kweli.

Watu takribani bilioni saba duniani hawamjui Mungu wa kweli kutokana na mafundisho ya kurithi ambayo yanatolewa na viongozi wa dini mbalimbali kwa kutojua usahihi wa kile wanachowaaminisha waamini wao.

Akizungunza  jijini Dar es Salaam  kuhusu hali ya umoja na uelewa wa watu kuhusu imani ya dini, Nabii Joseph Buberwa idadi hiyo ya watu duniani hawaelewi kweli Mungu wanayemwabudu na kumtumaini ni yupi.

Alisema viongozi wa dini zote duniani wanawafundisha waamini wao kuacha maovu na kwamba watakwenda Mbinguni baada ya maisha ya duniani kitua ambacho si kweli.

Nabii Buberwa alisema mbali ya kwamba watu hawamjui Mungu wa kweli ambaye jina lake halisi ni Yehova, bado kuna mambo makuu manne ambayo wameaminishwa kwa makosa na viongozi wao wa dini.

Aliyataja mambo hayo kuwa ni kuaminishwa kwamba wanadamu waliokwenda kinyume na matwaka ya Mungu watachomwa moto milele, maisha ya milele baada ya kifo ni Mbinguni, watu waliomcha Mungu wote watakwenda Mbinguni na Shetani alikuwa mtawala wa dunia tangu mwaka wa kwanza wa kuumbwa binadamu.

Alisema fundisho la kwamba watu wakifa kwa kumtumaini Mungu wataishi milele Mbinguni si kweli na maisha ya milele yako duniani na kwamba imeandikwa “Mshahara wa dhambi ni mauti” hivyo adhabu ya mtenda dhambi ni kifo cha milele.

Nabii huyo alisema hawalaumu viongozi wa dini kwa kufundisha mafundisho hayo ambayo ni potofu kwa kuwa hata wenye hawajui kwamba wanapotosha na ufafanuzi wa maelezo hayo uko katika kitabu cha Sefania 3:8-9.

Kwa mujibu wa Nabii Buberwa, Mungu amempa mipango ya kuwezesha vita vikomeshwe duniani ndani ya miaka saba ijayo, kuondoa uhalifu, ufisadi, umasikini na njaa ndani ya miaka 14 tangu, Novemba 5, 2012.

Alisema watu wanaoamini kwamba baada ya kifo wakifufuliwa watakwenda Mbinguni na waovu watachomwa milele wanaamini katika tumaini bandia na hilo limefafanuliwa katika Ufunuo wa Yohana 5:9-10.

Hata hivyo alisema watu 144,000 tu ndio watakaokwenda Mbinguni kutawala na Yesu Kristo na utawala huo utawahusu Watakatifu watakaokuwa wako duniani baada ya maisha ya sasa kutoweka na waliokufa wakitekeleza amri za Mungu watafufuliwa na kujumuika pamoja.

Chanzo:Gazeti la JAMBO LEO.