Meneja wa klabu ya Real Madrid ya Hispania, Jose Mourinho amewapongeza FC Barcelona kunyakuwa taji la Ligi Kuu ya nchi hiyo maarufu kama La Liga.

Jose Mourinho.

Meneja  wa klabu ya Real Madrid ya Hispania, Jose Mourinho amekiri kuwa FC Barcelona wamestahili kunyakuwa taji la Ligi Kuu ya nchi hiyo maarufu kama La Liga, kufuatia sare ya bao 1-1 iliyopata timu yake dhidi ya Espanyol jana(May 11,2013).

Espanyol, wakicheza Nyumbani, walitangulia kufunga Bao kupitia Christian Stuani katika Dakika ya 23 na Gonzalo Higuain kuisawazishia Real kwenye Dakika ya 58.

Katika mchezo huo Real Madrid walishindwa kutamba ugenini baada ya kujikuta wakitangulia kufungwa na wenyeji wao kabla ya mchezaji  Gonzalo Higuain kusawazisha lakini walishindwa kuongeza bao lingine ili kuhakikisha wanabakia katika mbio za Ubingwa. 

Kocha  Mourinho mwenye umri wa miaka 50 amesema anaipongeza Barcelona, makocha wao, wachezaji na mashabiki kwa kazi kubwa na yenye mafanikio waliyofanya katika msimu huu mpaka kuhakikisha wanatawadhwa mabingwa wapya wan chi hiyo.

Mbali na kuipongeza Barcelona,Kocha  Mourinho pia alionyesha kukasirishwa na swali aliloulizwa na mwandishi kuhusu sakata la kumuacha katika kikosi cha kwanza nahodha Iker Casillas  akidai kuwa akiwa kama kocha hapaswi kutoa sababu yoyote kuhusiana na hilo. 

Mourinho amesema kwasasa ligi ina Bingwa mpya hivyo anashangaa watu wanapozungumzia mchezaji mmoja, kwani yeye akiwa kama kocha ana uhuru wa kuchagua nani acheze na nani asicheze hivyo haoni kama swali hilo lilikuwa na maana.

Hata hivyo, Mourinho huenda akalazimika kumchezesha Pepe Ijumaa ijayo kwenye Fainali ya Copa del Rey kwa vile Mtu aliemyang’anya namba, Raphael Varane, huenda asiwe fiti baada ya kuumia.

Alipoulizwa hilo, Mourinho alijibu: “Ijumaa mtaona nani atacheza na huo utakuwa uamuzi wangu.’

Leo(May 12,2013) , Mabingwa wapya wa La Liga, FC  Barcelona, watasafiri kwenda Madrid kucheza na Atletico Madrid kwenye Mechi ya La Liga.