Obrey Chirwa na hat-trick ya pili,Yanga SC ikirejea Nafasi ya Pili ikisubiri Azam FC na Simba SC leo Taifa.

Mshambuliaji wa Yanga SC Obrey Chirwa pichani aliyeshika mpira Jana February 6,2018 amefunga hat-trick kwenye mchezo wa Ligi kuu Tanzania bara wakati klabu yake ikishinda kwa magoli 4-0 dhdi ya Njombe Mji FC kwenye uwanja wa Uhuru na kurudi nafasi ya pili kwenye msimamo wa Ligi Kuu.

 Pongezi ziende kwa mshambuliaji Mzambia, Obrey Chirwa aliyefunga mabao matatu peke yake, huku bao lingine likifungwa na mzawa, winga Emmanuel Martin.

Kwa ushindi huo, timu ya kocha Mzambia, George Lwandamina inafikisha pointi 34 baada ya kucheza mechi 17 sasa ikizidiwa pointi nne tu na vinara Simba SC, ambao Leo Jumatano watacheza mechi yao ya 17 dhidi ya Azam FC, iliyo nafasi ya tatu kwa pointi zake 33.

Hiyo ni hat-trick ya pili kwa Chirwa msimu huu, alifanya hivyo dhidi ya Mbeya City November 19, 2017 Yanga SC ilipopata ushindi mkubwa wa mabao 5-0 magoli mengi zaidi kufungwa na klabu hiyo tangu kuanza kwa msimu huu.

Chirwa amefikisha magoli 10 na kumuondoa John Bocco katika nafasi ya pili akiwa na magoli yake 9, Chirwa anazidiwa magoli mawili na Okwi ambaye anaongoza orodha ya wafungaji akiwa na magoli 12.

Njombe Mji imeshinda mechi mbili tu kati ya 17 za ligi kuu msimu huu, wamepoteza mechi nane na kutoka sare katika mechi saba hivyo wanaendelea kubaki katika nafasi ya mwisho (16) katika msimamo wa Ligi.