CECAFA Challenge 2016- Zanzibar yabondwa mabao 9-0 na Uganda.

Timu ya soka ya Wanawake ya Zanzibar imepoteza mchezo wake wa pili katika michuano ya Kombe la Mataifa ya Afrika Mashariki na Kati (CECAFA Challenge 2016) baada ya kufungwa mabao 9-0 na wenyeji Uganda jana September 13,2016 mjini Jinja.

Zanzibar iliyofungwa 10-1 na Burundi katika mchezo wa kwanza wa Kundi A, sasa itakamilsha mechi zake za kundi hilo kwa kumenyana na Kenya kesho kutwa wakati imekwishaaga mashindano hayo.

Timu ya Tanzania Bara, Kilimanjaro Queens kesho kutwa inacheza mechi yake ya mwisho ya Kundi B dhidi ya Ethiopia mjini Jinja.

Kilimanjaro Queens itahitaji ushindi  siku ya Ijumaa ili tu kuongoza Kundi B na kupata mpinzani tahfifu kidogo katika Nusu Fainali.

Hiyo inatokana na kwamba, Kilimanjaro Queens juzi ilijihakikishia kufuzu Nusu Fainali ya michuano hiyo baada ya ushindi wa mabao 3-2 dhidi ya Rwanda.

Nusu Fainali zitafuatia Septemba 18,2016 kabla ya fainali kufanyika Septemba 20, 2016 ikitanguliwa na mchezo wa kusaka mshindi wa tatu.