MATOKEO / RATIBA VPL 2015 / 2016:- Tazama Picha Yanga SC imekabidhiwa taji lao la Ubingwa wa VPL msimu wa 2015 /2016.

Yanga SC imekabidhiwa taji lao la Ubingwa wa VPL msimu wa 2015 /2016 baada ya kufanikiwa kulitetea taji hilo ambalo walilitwaa msimu uliopita wa Ligi kuu,2014/2015. 

Yanga SC imepewa kombe hilo na Waziri wa Kilimo, Mifugo na Uvuvi, Mhe.Mwigulu Nchemba Madelu Jana, Jumamosi Mei 14, 2016, ikiwa na pointi 72 baada ya kucheza mechi 29 na watacheza mechi yao ya mwisho na Majimaji FC mjini Songea wiki ijayo.

Katika mchezo huo,Yanga SC ililazimishwa sare ya kufungana mabao 2-2 na Ndanda FC katika mchezo wa Ligi Kuu ya Vodacom Tanzania Bara katika mchezo huo kwenye Uwanja wa Taifa, Dar es Salaam.

Ndanda FC ndiyo waliotangulia kupata bao kwa penalti dakika ya 29, mfungaji Omary Mponda aliyemchambua vizuri kipa wa Yanga SC, Deo Munishi ‘Dida’ baada ya beki Juma Abdul kumuangusha mshambuliaji Atupele Green kwenye boksi.

Yanga SC walisawazisha bao hilo dakika ya 36 kupitia kwa mfungaji bora wa Ligi Kuu msimu uliopita, Simon Msuva kwa shuti kali akimalizia krosi ya winga Geoffrey Mwashiuya.

Mshambuliaji hatari kutoka Zimbabwe, Donald Ngoma akaifungia Yanga SC bao la pili dakika ya 41 kwa shuti kali pia akimalizia krosi ya beki wa kushoto, Mwinyi Hajji Mngwali.

Kipindi cha pili, timu zote zilianza na mabadiliko, Yanga SC wakimpumzisha Mwinyi Mngwali na kumuingiza Oscar Joshua na Ndanda wakimpumzisha Riffat Hamisi na kuingia Ahmed Msumi.

Mabadiliko hayo yaliinufaisha Ndanda FC iliyopata bao la kusawazisha dakika ya 79 lililofungwa na Minely aliyemalizia pasi ya Atupele Green.

Waziri wa Kilimo na Mifugo Mhe. Mwigulu Nchemba ambaye alikuwa mgeni rasmi wa mchezo huo alilikabidhi kombe hilo kwa nahodha Nadir Haroub ‘Cannavaro’ baada ya kumalizika kwa mchezo kati ya Ndanda FC  dhidi ya Yanga SC na Ubingwa huo unawafanya Azam FC kulikosa taji hilo ndani ya misimu miwili mfululizon wakati Simba SC wao wameendelea kulikosa taji hilo ndani ya misimu minne mfululizo.