MATOKEO / RATIBA VPL 2015/2016:-Simba SC yainyamazisha Tanzania Prisons 1- 0 ..sasa Pointi nne mbele.

‘’Wekundu wa Msimbazi’’Simba SC imeendelea kutamba kwenye Ligi  Kuu soka ya Vodacom Tanzania bara msimu huu 2015/2016 baada ya kuinyamazisha Tanzania Prisons ya Mbeya bao 1- 0 kwenye mchezo wa raundi ya pili ya Ligi uliochezwa kwenye uwanja wa Taifa,Jioni ya Leo March 13, 2016.

Ushindi huo ni kisasi kwa Simba SC baada ya kufungwa 1-0 na Prisons katika mchezo wa kwanza wa Ligi Kuu msimu huu Uwanja wa Sokoine mjini Mbeya.

Bao pekee lililoipa Pointi 3, Simba SC limewekwa wavuni dakika ya 86 na kiungo Awadh Juma kwa shuti kali akiwa nje ya box la 18 na kupeleka shangwe mtaa wa Msimbazi, Kariakoo.

 Matokeo hayo yanaifanya sasa, Simba SC wameshinda mchezo wa tatu mfululizo baada ya kufungwa na Yanga SC bao 2- 0.

Wekundu wa Msimbazi sasa wanafikisha pointi 54 baada ya kucheza mechi 23 wakiwazidi pointi nne, mabingwa watetezi, Yanga SC walio nafasi ya pili, lakini wamecheza mechi pungufu, 21. Azam FC yenye pointi 47 za mechi 20 ni ya tatu.

Mchezo mwingine wa Ligi Kuu leo, Mgambo JKT imelazimishwa sare ya kufungana bao 1-1 na Mwadui FC ya Shinyanga Uwanja wa Mkwakwani, Tanga, wakati jana March 12,2016 , Mtibwa Sugar imeifunga 2-1 JKT Ruvu Uwanja wa Manungu, Turiani, Morogoro.