VPL 2015/2016:-Simba SC yaongeza pointi tatu za Ligi Kuu ikiifunga Ndanda FC bao 1-0.

Simba SC imejiongezea ppointi tatu za Ligi Kuu Bara baada ya kuitwanga Ndanda FC kwa bao 1-0.

Shujaa wao ni mshambuliaji  Ibrahim Hajib Migomba (pichani kulia) ametokea benchi na kuifungia Simba SC bao pekee ikishinda 1- 0 dhidi ya wenyeji Ndanda FC katika mchezo wa Ligi Kuu ya Vodacom Tanzania Bara jioni ya leo January 01,2016 kwenye Uwanja wa Nangwanda Sijaona, Mtwara.

Katika mchezo huo, mwamuzi msaidizi namba moja, Mohammed Mkono wa Tanga alikataa bao moja la kila timu, akisema wafungaji waliotea.

Atupele Green aliunganisha krosi ya William Lucian ‘Gallas’ dakika ya nane na kutinga nyavuni, lakini akaambiwa alikuwa ameotea kabla.

Daniel Lyanga naye aliunganishia mpira nyavuni dakika ya 62 baada ya pasi ya Hajib, lakini refa Rajab Mrope wa Songea akaafiki maamuzi ya Mkono kwamba mfungaji alikuwa ameotea kabla.

Ushindi huo, unawafanya Simba SC wafikishe pointi 27 baada ya kucheza mechi 13 na kupanda hadi nafasi ya tatu, nyuma ya mabingwa watetezi, Yanga SC wenye pointi 33 na Azam FC pointi 35.

Ligi Kuu inakwenda mapumzikoni kwa mara nyingine hadi katikati ya mwezi, kupisha michuano ya Kombe la Mapinduzi inayoanza keshokutwa ,January 03,2016 visiwani Zanzibar.

 

Papo kwa Papo >>>> Pata Picha, Habari za  Siasa, Kijamii, Biashara, Muziki na Michezo na Nyingine kwa kujiunga  na mimi hapa…..FACEBOOK , TWITTER , INSTAGRAM , Pia tutumie tukio la Picha kwa WhatsApp .