TANZIA :-Mwili wa aliyekuwa Waziri Ofisi ya Rais, Celina Ompeshi Kombani umerejeshwa nchini leo September 26,2015.

Mwili wa aliyekuwa Waziri Ofisi ya Rais, Menejimenti ya Utumishi wa Umma na Mbunge wa Ulanga Mashariki, Celina Ompeshi Kombani umerejeshwa nchini hii leo September 26,2015, na kupokelewa na watu mbalimbali wakiwepo Viongozi wa Serikali, Ndugu jamaa na marafiki kutoka nchini India, alikofariki wakati akipatiwa matibabu ya saratani.

Taarifa ya Ofisi ya Bunge iliyotumwa kwa vyombo vya habari jana September 25,2015, imeeleza kuwa mwili huo, utaletwa kwa ndege ya Shirika la Ndege la Emirates na kupokewa katika Uwanja wa Ndege wa Kimataifa wa Julius Nyerere.

Kwa mujibu wa taarifa hiyo, Kombani anatarajiwa kuzikwa mkoani Morogoro katika shamba lake. Mipango ya mazishi imekuwa ikiendelea kufanywa na Serikali kwa kushirikiana na Ofisi ya Bunge na familia ya marehemu.

 

 

Celina Ompeshi Kombani pia alikuwa mgombea ubunge wa Jimbo la Ulanga Mashariki mkoani Morogoro kwa tiketi ya Chama Cha Mapinduzi (CCM).

Amekuwa mbunge wa jimbo hilo kwa kipindi cha miaka 10 iliyopita. Historia yake Kombani alizaliwa Juni 19, 1959. Alifariki juzi Septemba 24, 2015 nchini India, ambako alikuwa anapatiwa matibabu baada ya kugundulika kuwa na saratani. Ameacha mume, watoto watano na wajukuu wanne.

Alisoma katika Shule ya Msingi Kwiro wilayani Ulanga mwaka 1968-1975 na Shule ya Sekondari Kilakala 1975-1978. Baadaye alisoma katika Shule ya Sekondari ya Wasichana Tabora kwa masomo ya juu ya sekondari mwaka 1979-1981.

Baada ya masomo ya elimu ya sekondari, Kombani alijiunga na Chuo cha Maendeleo ya Uongozi Mzumbe (IDM Mzumbe) mwaka 1982-1985 na kati ya 1994-1995 alisomea Shahada ya Pili ya Uongozi katika Chuo hicho cha Mzumbe.

Kombani aliwahi kuwa Ofisa Utawala Mkuu wa Chuo Kikuu cha Kilimo Sokoine (SUA)mkoani Morogoro, Meneja Kiwanda cha Ngozi Morogoro, Ofisa wa Halmashauri ya Wilaya ya Kilosa mkoa wa Morogoro, Naibu Waziri Ofisi ya Waziri Mkuu (Tamisemi), Waziri wa Nchi Ofisi ya Waziri Mkuu (Tamisemi) mwaka 2008-2010 na Waziri wa Katiba na Sheria. 

Mungu ailaze roho ya Kombani mahala pema peponi.

 

 

Viongozi mbalimbali wakiwa katika uwanja wa ndege wa Mwalimu Julias Nyerere jijini Dar es Salaam tayari kwa kuupokea mwili wa marehemu Celina Kombani. PICHA KWA HISANI YA  KAJUNASON BLOG

 

Papo kwa Papo >>>> Pata Picha, Habari za  Siasa, Kijamii, Biashara, Muziki na Michezo na Nyingine kwa kujiunga  na mimi hapa…..FACEBOOK , TWITTER , INSTAGRAM , Pia tutumie tukio la Picha kwa WhatsApp +255789925630.