AFYA YETU:-Serikali Tanzania Yatoa Ripoti Mwenendo wa Kipindupindu Nchini.

Naibu Katibu Mkuu (TAMISEMI) Dk. Deodatus Mtasiwa akitoa ufafanuzi wa jambo kwenye mkutano huo na wanahabari (hawapo pichani).

Kutoka kushoto ni, Mkurugenzi wa Huduma za Kinga Wizara ya Afya, Dk. Neema Rusibamayila, Naibu Katibu Mkuu (Tamisemi), Dk. Deodatus Mtasiwa na Kaimu Katibu Mkuu, John Michael.

Wanahabari wakichukua tukio hilo.

SERIKALI ya Tanzania kupitia Wizara ya Wizara ya Afya, Maendeleo ya Jamii, jinsia, Wazee na Watoto leo imetoa ripoti yake ya wiki juu ya mwenendo wa kipindupindu hapa nchini.

Akizungumza na wanahabari leo,January 18,2016, jijini Dar es Salaam katika ofisi za wazara hiyo, Mkurugenzi wa Huduna za Kinga Nchini, Dk. Neema Rusibamayila amesema kuwa katika kipindi cha wiki moja kuanzia Januari 11 hadi 17,2016 kulikuwa na wagonjwa wapya 549 na vifo 10 huku mikoa iliyoripoti kuwa na ugonjwa ikiongezeka kutoka 11 hadi kufikia 16 ukilinganisha na wiki iliyopita.

Rusibamayila amesema, mikoa hiyo iliyoongezeka kwa kurudia kuripoti wagonjwa wapya baada ya kudhibiti ugonjwa kwa wiki zilizopita ni Dar es Salaam, Lindi, Rukwa, Kagera na Kilimanjaro huku akiongeza kuwa bado kuna mikoa inaendelea kuripoti wagonjwa ikiwa ni pamoja na Morogoro, Arusha, Singida, Manyara, Pwani ,Dodoma, Geita, Mara, Tanga, Mwanza na Simiyu.

Aidha, alisema Mkoa wa Morogoro unaendelea kuripoti idadi kubwa ya wagonjwa (Manispaa ya Morogoro wagonjwa 120, Halmashauri ya Morogoro wagonjwa 40 ) ikifuatiwa na Mkoa wa Simiyu wenye idadi ya watu 50.

Hata hivyo, Rusibamayila ameeleza namna mwananchi anavyoweza kupata huduma ya kufahamu dalili za ugonjwa huo wa kipindupindu kupitia njia ya simu ya mkononi kwa kupiga namba 117 kisha  kusikiliza ujumbe wa sauti, au kuandika ujumbe wa maneno “kipindupindu/cholera” kwenda namba 15774  na huduma hiyo haina malipo yoyote kwa mtumiaji.

Alisema kuanzia Agosti mwaka jana 2015, ugonjwa huo ulipoanza hapa nchini hadi jana Januari 17, 2016  jumla ya watu 14,105 wameugua ugomjwa huo na kati yao 218 wamepoteza maisha kwa maradhi hayo ya kipindupindu.

NA DENIS MTIMA/GPL.

 Papo kwa Papo >>>> Pata Picha, Habari za  Siasa, Kijamii, Biashara, Muziki na Michezo na Nyingine kwa kujiunga  na mimi hapa…..FACEBOOK , TWITTER , INSTAGRAM , Pia tutumie tukio la Picha kwa WhatsApp +255789925630 .