INAKUHUSU ABIRIA MKOANI KAGERA:-Soma hii ya SUMATRA-Kagera kukutaka kudai tiketi wakati ukiwa Safarini.

Nje Kidogo ya Stand kuu ya Mabasi wilayani Ngara mkoani Kagera na ni Basi la Nyehunge linalofanya safari zake kati ya Wilaya ya Ngara Mkoani Kagera na Jiji la Mwanza.

 Wasafiri wanaotumia vyombo vya kubeba abiria mkoani Kagera wametakiwa kudai haki zao zinazopaswa kutolewa wakati wakiwa safarini na kujitokeza kutoa taarifa pale panapojitokeza kuwepo mazingira ya unyanyasaji wakati wa safari.

Ushauri huo umetolewa na Afisa Mfawidhi wa Mamlaka ya kuthibiti vyombo vya Usafiri wa majini na nchi kavu (SUMATRA) mkoa wa Kagera, Kapten Alex Katama,wakati akizungumzia juu ya mamlaka hiyo ilivyojipanga kukabiliana na changamoto mkoani Kagera.

Kapteni Katama amekiri kuwepo changamoto mbalimbali zinazojitokeza wakati wa abiria wakiwa ndani ya vyombo vya usafiri,ingawa taarifa dhidi ya changamoto hizo zimekuwa hazitoshelezi kutokana na baadhi ya watu kutozipa umuhimu na kuzifikisha kwenye ofisi za mamlaka ili zitafutiwe ufumbuzi.

Ametaja mojawapo ya changamoto ambazo zimekuwa zikijitokeza mara kwa mara ni abiria kuzidishiwa nauli pamoja na matumizi mabaya ya lugha,hata hivyo taarifa za changamoto hizi zimekuwa hazifikishwi katika ofisi za mamlaka.

Pamoja na matatizo haya kuendelea kujitokeza miongoni mwa abiria,Mamlaka imekuwa ikiendelea kutoa ushauri kwa watu wote watumiao usafiri wa abiria,kuhakikisha wanatambua haki zao na kujitokeza kufika ofisi za mamlaka kutoa taarifa pale haki hizo zinaposhindwa kutolewa.

Amewataka abiria kuliona suala la kupewa tiketi kama usumbufu,kwani ni haki ya kila abiria kupewa tiketi ya nauli aliyolipa na umbali aliosafiri,ili baadae vyombo vya sheria viweze kulisghulikia kikamilifu suala hilo iwapo ikitokea malalamiko ya kuongezeka nauli.

Aidha, Kapteni Katama amewataka abiria kuthamini umuhimu wa uhai wao,kwa kuepuka kupandishwa ndani ya gari wakati hakuna kiti cha kukalia,ili kuepusha ajari mbalimbali zinazoweza kujitokeza.

Ameongeza kuwa kwa kawaida abiria aliyesimama ndani ya gari hawezi kupata mkanda wa kujifunga kwenye kiti,hivyo ikiwa ghafla ajari ikatokea anayeweza kuhudhurika kwa haraka ni yule aliyesimamishwa,vile vile hata shirika la BIMA la taifa haliwezi kumtambua,hivyo kutoa rai kwa kila abiria kulichukulia hilo kama ni kuokoa maisha yake.

Hata hivyo,afisa huyo wa SUMATRA mkoani Kagera, amewashauri wamiliki wa vyombo vya ushafiri mkoani humo kufuata  sheria na taratibu zilizowekwa dhidi yao,vinginevyo mamlaka haitasita kumchukulia hatua mmiliki yeyote atakayebainika kwenda kinyume.

UKIONA TUKIO LOLOTE LINATOKEA USISITE KUTUTUMIA PICHA KUPITIA WhatsApp:- 0789-925-630.

 

 Like ukurasa wetu wa facebook  ili habari ziwe zinakuijia punde tu zinapoweka kwenye mtandao huu BONYEZA HAPA