WAZIRI WA FEDHA TANZANIA:- Bajeti ya Serikali kwa mwaka fedha 2014/15 ni Sh. 19.9 Trilioni.

Spika wa Bunge la Tanzania ,Mhe. Anne Makinda akitoa maneno ya utangulizi kwa Waheshimiwa Wabunge wakati wa semina ya wabunge wote April 30,2014,kwa ajili ya uwasilishwaji wa mapendekezo ya mfumo wa bajeti ya serikali kwa mwaka 2014/2015.

Waziri wa Fedha wa Tanzania,Mhe. Saada Mkuya Salum akiwasilisha Mapendekezo ya Mfumo wa Mapato na Matumizi ya serikali kwa mwaka wa fedha 2014/15 kwa Waheshimiwa Wabunge.

Waziri wa Nchi, Ofisi ya Rais - Uhusiano Mhe. Steven Wazira akiwasilisha mwelekeo wa hali ya uchumi kwa mwaka 2014/2015 kwa waheshimiwa wabunge.

Katibu wa Bunge Dkt. Thomas Kashilila akisikiliza kwa makini hotuna ya Waziri wa Fedha Mhe. Saada Mkuya Salum akiwasilisha Mapendekezo ya Mfumo wa Mapato na Matumizi ya serikali kwa mwaka wa fedha 2014/15 kwa Waheshimiwa Wabunge.

Wabunge wakifuatilia hotuba kwa makini.

Waziri Mkuu Mhe. Mizengo Pinda, Waziri wa Fedha Mhe. Saada Mkuya Salum na Waziri wa Nchi, Ofisi ya Rais - Uhusiano Mhe. Steven Wazira wakipitia nyaraka mbalimbali wakati Spika wa Bunge Mhe. Anne Makinda akitoa maneno ya utangulizi kwa Waheshimiwa Wabunge wakati wa semina ya wabunge wote kwa ajili ya uwasilishwaji wa mapendekezo ya mfumo wa bajeti ya serikali kwa mwaka 2014/2015.

Watendaji wa Wizara ya Fedha wakimsikiliza Waziri wa Fedha Mhe. Saada Mkuya Salum…Picha na Owen Mwandumbya.

Serikali imetoa mwelekeo wa Bajeti ya mwaka wa fedha wa 2014/15 kuwa ni Sh19.6 trilioni, ikilinganishwa na Sh18.2 za Bajeti iliyopita.

Vipaumbele vya Bajeti hiyo ni kuendeleza Mpango wa Maendeleo wa Miaka Mitano ulioanza mwaka 2011 na Mpango wa Matokeo Makubwa Sasa (BRN) ambao unajumuisha maeneo sita ya kitaifa ya kilimo, elimu, maji, utafutaji wa rasilimali fedha, nishati, uchukuzi na uboreshaji wa mazingira ya kufanyia biashara.

Katika kuhakikisha inakusanya fedha za kutosha, Serikali imeahidi kuunda kikosi kazi cha kufuatilia mapato yote yanayotoka halmashauri zote nchini ili kuondoa visingizio vilivyojitokeza wakati wa ufuatiliaji wa mapato.

Hayo yalielezwa jana(April 30,2014) na Waziri wa Fedha, Saada Mkuya wakati akiwasilisha mapendekezo ya Bajeti hiyo kwa kamati zote za Bunge, Dar es Salaam.

Alisema matumizi ya kawaida kwa mwaka ujao wa fedha yanalenga kufanikisha mambo 20 muhimu, yakiwamo Uchaguzi wa Serikali za Mitaa mwaka 2014, Uchaguzi Mkuu 2015, kukamilisha mchakato wa Katiba na nyongeza ya mishahara na kulipa kwa wakati.

Mkuya alisema makadirio ya matumizi ya maendeleo ni Sh7.7 trilioni sawa na asilimia 39 ya matumizi yote ya Serikali.

Kati ya fedha hizo, miradi ya maendeleo imetengewa Sh5.4 trilioni sawa na asilimia 27 na matumizi mengine ya maendeleo ni Sh2.2 trilioni.

Utegemezi.

Mkuya alisema katika mwaka unaomalizika, Serikali ilipanga kukopa Dola 700 milioni za Marekani sawa na Sh1.1 trilioni na kati ya kiwango hicho, iliambulia mkopo wa Dola 259 milioni hivyo kuweka nakisi ya Dola 441.

Alisema katika mwaka wa fedha 2014/2015, Serikali imekusudia kukopa Sh4.2 trilioni kutoka vyanzo vya mapato vya ndani na nje ili kuziba pengo la mapato.

Misaada na pato la taifa.

Katika mwaka wa 2013/2014, Serikali ilipokea misaada ya Sh1.1 trilioni kutoka kwa washirika wa maendeleo ikiwa ni asilimia 50 ya ahadi ya Sh2.3 trilioni, hivyo kuweka nakisi ya Bajeti ya Sh1.2 trilioni. 

Akiwasilisha Rasimu ya Mpango wa Maendeleo wa Taifa mwaka 2014/2015, Waziri wa Nchi, Ofisi ya Rais (Uhusiano na Uratibu), Stephen Wassira alisema deni la Taifa limefikia Sh27.04 trilioni kutoka Sh24 trilioni na kufafanua kuwa ongezeko la deni hilo limetokana na mikopo mipya ya kibiashara na ya masharti nafuu.

Ukusanyaji mbovu wa mapato.

Akizungumzia ukusanyaji wa kodi, Waziri Mkuu, Mizengo Pinda alisema kumekuwa na matatizo katika ukusanyaji wa mapato ya ndani, hasa yasiyotokana na kodi.