FAINALI UEFA 2013/2014:- Estádio da Luz, Lisbon, Ureno 24 Mei 2014-Ni Real Madrid v Atletico Madrid baada ya Chelsea kubondwa 3-1 Darajani.

Wakiwa ugenini Stamford Bridge jana April 30,2014, Atletico Madrid wamelichakaza vilivyo basi la Chelsea na kufanikiwa kutinga fainali ya Ligi  ya Mabingwa Ulaya itakayochezwa uwanja wa Estádio da Luz, Lisbon, Portugal/Ureno  24 Mei 2014 kwa kushinda kwa mabao 3-1 na wanakwenda sasa kuvaana na watani wao wa jadi Real Madrid.

Fernando Torres alitangulia kuifungia Chelsea dakika ya 36 kwa pasi ya Azpilicueta baada ya kazi nzuri ya Willian, lakini Adrian Lopez akaisawazishia Atletico dakika ya 44 kwa pasi ya Juanfran.

Kwa kufungwa bao 3-1 sasa Chelsea imeaga Ligi ya Mabingwa Ulaya msimu huu wa 2013/2014 na Atletico sasa itakutana na jirani zao, Real Madrid katika fainali May 24,2014, nchini Ureno, ambao nao April 29,2014, waliwang’oa mabingwa watetezi, Bayern Munich kwa 4-0 mjini Munich na kufanya ushindi wa jumla wa  5-0.

Fainali hiyo itazikutanisha timu za mji wa Madrid, zote zikiwa na jina la Madrid na zina upinzani mkubwa kisoka, hivyo Real Madrid wanaingia katika fainali hiyo na Kombe lao la 9 la Ulaya, na sasa wanasaka Taji la 10 ambalo wenyewe wamelibatiza ‘LA DECIMA’.

Diego Costa akafunga bao la pili kwa penalti dakika ya 61 kabla ya Arda Turan kumaliza kazi dakika ya 72 na Atletico imefuzu kwa ushindi wa jumla wa 3-1 baada ya sare ya 0-0 katika mchezo wa kwanza Madrid wiki iliyopita.

Mabadiliko yaliyofanywa na kocha Jose Mourinho dakika ya 54 kumtoa beki Ashley Cole na kumuingiza mshambuliaji  Samuel Eto’o ndiyo yaliigharimu Chelsea. Eto’o ndiye aliyesababisha penalti iliyofungwa na Costa.