Dr.Slaa asema kuwa CHADEMA haiogopi Kusikuliza Rufaa ya aliyekuwa Naibu Katibu Mkuu ambaye pia ni Mbunge wa Kigoma Kaskazini kupitia Chadema Bw. Zitto Kabwe.

Dk Slaa akiwa katika picha ya pamoja na wanachama wapya wanne kushoto kwake waliojiunga katika chama hicho cha CHADEMA jana(Januari 27,2014) ambapo Dk Wilbrod Slaa amesema hawaogopi kuita Baraza Kuu la chama hicho ili kusikiliza rufaa ya aliyekuwa Naibu Katibu Mkuu na Mbunge Bw. Zitto Kabwe kama inavyodaiwa na baadhi ya watu.

Umati wa watu uliojitokeza kumsikiliza Dr.Slaa na pamoja na mambo mengine amebainisha kuwa Oparesheni ya M4C Pamoja Daima haifanywi na chama hicho kwa ajili ya kusmshughulikia Kabwe, inafanywa ikiwa ni maandalizi yao ya kuelekea uchaguzi wa serikali za mitaa utakaofanyika baadaye mwaka huu.

Katibu Mkuu wa Chama cha Demokrasia na Maendeleo (Chadema), Dk Wilbrod Slaa amesema hawaogopi kuita Baraza Kuu la chama hicho ili kusikiliza rufaa ya aliyekuwa Naibu Katibu Mkuu Zitto Kabwe kama inavyodaiwa na baadhi ya watu.

Alisema chama hicho kitaitisha kikao hicho hivi karibuni ili kusikiliza utetezi wa Kabwe ambaye pia ni Mbunge wa Kigoma Kaskazini kupitia Chadema.

Akihutubia mamia ya wakazi wa manispaa ya Iringa na vitongoji vyake katika uwanja wa Mbwetogwa juzi , Dk Slaa alisema Zitto alivuliwa nafasi zake za uongozi ndani ya chama hicho baada ya kubainika amekiuka maadili ya chama.

“Hata nikiwa mimi aua Mwenyekiti wangu Freman Mbowe au kiongozi mwingine yoyote yule au mwanachama, akikiuka maadili ya chama ni lazima achukuliwe hatua za kinidhamu,” alisema.

Alisema hivisasa Zitto aruhusiwi kufanya shughuli za kichama kupitia jukwaa la Chadema kwa kuwa si kiongozi tena wa Chadema, rufaa yake haijasikilizwa na kafungua kesi mahakamani.

“Wanachama, wapenzi na wadau wote wa Chadema msimpe ushirikiano wowote Zitto mpaka sula lake litakapohitimishwa,” alisema.

Alisema oparesheni ya M4C Pamoja Daima haifanywi na chama hicho kwa ajili ya kusmshughulikia Kabwe, inafanywa ikiwa ni maandalizi yao ya kuelekea uchaguzi wa serikali za mitaa utakaofanyika baadaye mwaka huu.

Akinukuliwa na gazeti la jamboleo la jana, Kabwe amesema hakuna wa kumzuia kufanya mikutano nchini.

Kwa kupitia taarifa ya gazeti hilo alinukuliwa akisema “kama kuna mtu anadhani sitaweza kufanya mkutano wa aina yoyote katika maeneo mbalimbali nchini anajidanganya, nitazunguka kuzungumza na wananchi kwa maslahi ya taifa hili na ni haki yangu kikatiba.”

Alisema atafanya mikutano hiyo kama mbunge kwa kuwa ni wajibu wake kikatiba kuzungumza na wananchi kuhsusu mambo mbalimbali.

Wengine waliohutubia mkutano huo ni pamoja na Mbunge wa Jimbo la Iringa Mjini, Mchungaji Peter Msigwa na Mbunge wa Kawe Dar es Salaam, Halima Mdee.

Viongozi hao walitumia fursa waliyopewa kujibu hoja mbalimbali zinazotolewa na viongozi wa Chama cha Mapinduzi (CCM) mkoani Iringa zikimponda mbunge wa jimbo la Iringa Mjini anayedaiwa kashindwa kutekeleza ahadi zake alizotoa wakati wa Uchaguzi Mkuu wa 2010.

Katika mkutano huo, Dk Slaa pia aliwapokea na kuwapa kadi za Chadema, wanachama wanne kutoka CCM, TLP na NCCR- Mageuzi.