HISTORIA imeandikwa! .. Tamasha la Usiku wa Matumaini 2013, Yanga ikiibuka kidedea kwa kuilaza Simba kwa jumla ya penalti 4 kwa 3.

Tamasha hilo la kila mwaka ambalo Rais wa Jamhuri ya Muungano wa Tanzania, Dk. Jakaya Mrisho Kikwete ndiye aliyekuwa mgeni rasmi ambapo Katika hotuba yake, Rais Kikwete aliwahimiza Watanzania kutokubali kubaguliwa kwa itikadi za kisiasa na kidini na kuwasihi kuendeleza mshikamano.

Rais JK (katikati)akielekea uwanjani kuanza mechi huku Kushoto ni na Eric Shigongo, mwandaaji wa Tamasha la Matumaini na Kulia ni Waziri wa Habari, Vijana, Utamaduni na Michezo, Dk. Fenella Mukangara .

Kikosi cha wabunge wapenzi wa Simba katika Tamasha la Usiku wa Matumaini 2013 ,tayari kwa mchezo wao uwanja wa Taifa dhidi ya Yanga jana (Julai 07,2013).

Kikosi cha wabunge wapenzi wa Yanga pamoja na waamuzi wa pambano lao dhidi ya Simba katika Tamasha la Usiku wa Matumaini 2013 , uwanja wa Taifa dhidi ya Yanga jana (Julai 07,2013).

Historia imeandikwa! Jana Jumapili, Uwanja wa Taifa jijini Dar es Salaam, ulitingishika kutokana na burudani ya nguvu iliyotolewa kwenye Tamasha la Usiku wa Matumaini 2013, lililoanza mapema asubuhi na kurindima hadi usiku mnene, Timu ya Ijumaa Wikienda ilikuwepo mwanzo mwisho.

JK NDANI.

Tamasha hilo la kila mwaka ambalo Rais wa Jamhuri ya Muungano wa Tanzania, Dk. Jakaya Mrisho Kikwete ndiye aliyekuwa mgeni rasmi, lilianza mishale ya asubuhi na baadaye burudani ya muziki wa dansi ilichukua nafasi wakati umati mkubwa wa watu ukianza kuingia uwanjani hapo.

UFUNGUZI.

Bendi ya Mlimani Park ‘Sikinde’ ndiyo iliyokuwa ya kwanza kufungua pazia la burudani na kufuatiwa na Msondo, waliowakosha vilivyo mashabiki waliokuwepo huku Romani Mng’ande ‘Romario’ akigeuka kivutio kikubwa kwa jinsi alivyokuwa ‘anayarudi’ jukwaani.

Baada ya burudani tamu ya muziki wa dansi kutoka kwa Sikinde na Msondo, waimbaji wa Injili nao walianza kulishambulia jukwaa kwa zamu.

Waimba Injili, Edison na Ambwene Mwasongwe, waliwajibika ipasavyo jukwaani na kushangiliwa sana, baada ya hapo, Mwenyekiti wa Taasisi ya East Africa Speakers Bureau (EASB), Paul Mashauri alitoa neno la matumaini na ujasiriamali.

INJILI.

Baada ya hapo, ‘maemsii’, Steve Mengere ‘Nyerere’ na Hemed Maliyaga ‘Mkwere’ waliruhusu mlipuko wa muziki wa Injili uendelee, waimba Injili wa Tanzania na Kenya wakawa wanapishana jukwaani wakiwemo Martha Mwaipaja, Enock, 24 Elders na Sarah K kutoka Kenya, Flora Mbasha na mumewe, Emmanuel Mbasha, Solomon Mukubwa, Glorious Singers na wengine kibao, asikwambie mtu upako ulishuka!

JK.

Baada ya burudani hiyo, Mkurugenzi wa Global Publishers, Eric Shigongo alihutubia kisha kumkaribisha Waziri wa Habari, Vijana, Utamaduni na Michezo, Dk. Fenella Mukangara aliyemkaribisha Rais Kikwete.

Katika hotuba yake, Rais Kikwete aliwahimiza Watanzania kutokubali kubaguliwa kwa itikadi za kisiasa na kidini na kuwasihi kuendeleza mshikamano.

DIMBANI.

Baada ya kumaliza kuhutubia, Kikwete alishuka dimbani na kuwakagua wachezaji wa timu za wabunge wa Simba na Yanga kisha akapuliza kipyenga kuashiria kuanza kwa mechi hiyo.

JK AFUNIKA.

Rais JK alifunika ile mbaya baada ya kuchukua kipyenga na kukipuliza kwa umaridadi mkubwa kuashiria kuanza kwa mchezo, hali iliyowafanya wengi kuamini kweli ni mdau wa michezo aliyekamilika.

Wimbo ya Taifa ukipigwa, kila mtu mguu katika Tamasha la Usiku wa Matumaini 2013 ,lililofanyika uwanja wa Taifa jana (Julai 07,2013).

JK akisalimiana na wachezaji wabunge wa Simba katika Tamasha la Usiku wa Matumaini 2013 ,lililofanyika uwanja wa Taifa jana (Julai 07,2013).

Rais Kakaya(JK) akiweka saini katika mpira utaochezewa katika mchezo Baina ya Wabunge wa Simba na Yanga katika Tamasha la Usiku wa Matumaini 2013 ,lililofanyika uwanja wa Taifa jana (Julai 07,2013) pembeni yake ni refa Othman Kazi.

JK akisalimiana na wachezaji wabunge wa Yanga katika Tamasha la Usiku wa Matumaini 2013 ,lililofanyika uwanja wa Taifa jana (Julai 07,2013).

Bango likiwa na Maelezo wakati wa Tamasha la Usiku wa Matumaini 2013 ,lililofanyika uwanja wa Taifa jana (Julai 07,2013) .

SOKA SAFI UWANJANI.

Wabunge wa Simba na Yanga walioneshana soka dimbani lakini mpaka mwamuzi wa mchezo huo, Othman Kazi anapuliza kipyenga cha mwisho, si Simba wala Yanga waliokuwa wameliona lango la mwenziye hivyo kuamuru mshindi apatikane kwa changamoto za penalti.

Wabunge wakikwaana uwanjani.

NI YANGA KATIKA USIKU WA MATUMAINI 2013.

Baada ya kupigiana penalti, Timu ya Yanga iliibuka kidedea kwa kuilaza Simba kwa jumla ya penalti 4 kwa 3 hivyo kombe maalum lililoandaliwa likanyakuliwa na Timu ya Wabunge wa Yanga na kukabidhiwa kwao na Waziri Mukangara.

Timu ya Wabunge ya Yanga iliibuka kidedea kwa kuilaza Simba kwa jumla ya penalti 4 kwa 3 hivyo kombe maalum katika Tamasha la Usiku wa Matumaini 2013 ,lililofanyika uwanja wa Taifa jana (Julai 07,2013).

SOKA BONGO MOVIES v/s BONGO FLEVA.

Wakati shamrashamra za ushindi zikiendelea, Timu za Bongo Movie na Bongo Fleva nazo zilijitupa uwanjani.

Katika mechi hiyo, Bongo Fleva ndiyo waliokuwa wa kwanza kuzifumania nyavu za wenzao lakini baada ya muda, Bongo Movie walichomoa kupitia kwa mshambuliaji wao, Vincent Kigosi ‘Ray’ na kufanya ubao wa matangazo usomeke 1-1.

Mpaka mwamuzi anapuliza kipyenga cha mwisho, bado matokeo yalikuwa ni sare, hali iliyolazimu ipigwe mikwaju ya penalti ambapo Bongo Fleva waliibuka na ushindi wa penalti 2-1.

MZEE YUSUF.

Mzee Yusuf na kundi lake zima la Jahazi Modern Taarab, walivamia steji na kuwakosha vilivyo maelfu ya mashabiki waliohudhuria.

KITUKO.

Wakati Mzee Yusuf akikandamiza stejini, jamaa mmoja ambaye jina halikupatikana alijikuta akigeuka kituko baada ya kupandwa midadi na kuvua nguo hadharani.

NDONDI / MASUMBWI.

Baada ya kumalizika kwa mechi hizo kisha Mzee Yusuf kutumbuiza, uliwadia wasaa wa masumbwi ambapo Mbunge wa Viti Maalum (UV-CCM), Ester Bulaya alifungua ulingo kwa kuzichapa na Aunt Ezekiel na matokeo ya jumla, wote wawili walifungana pointi katika pambano hilo la raundi mbili.

Baada ya hapo, Mbunge wa Kawe (Chadema), Halima Mdee alifuana na Jacqueline Wolper na matokeo yalikuwa ni wawili hao kufungana kwa pointi hivyo hakukuwa na mbabe.

Katika Tamasha la Matumaini 2013, Jackline Wolper na Halima Mdee walizipiga ....hapakupatikana mshindi baada ya kutoka Droo.

Pambano hilo lilipomalizika, Vincent Kigosi ‘Ray’ alipanda ulingoni akiwa tayari kuzichapa na Mbunge wa Kigoma Kaskazini (Chadema), Zitto Kabwe lakini kutokana na sababu zilizokuwa nje ya uwezo, mheshimiwa huyo hakutokea ulingoni hivyo Ray kuibuka na ushindi wa mezani.

MIYEYUSHO, MASHALI WAWAKALISHA WAKENYA.

Ilifika zamu ya mapambano ya kimataifa ambapo Francis Miyeyusho wa Tanzania alipanda ulingoni na Shadrack Muchanje kutoka Kenya.

Katika pambano hilo la kuvutia, Miyeyusho alimshikisha adabu mpinzani wake raundi ya kwanza katika dakika ya pili na kumtoa kwa Knock-Out (KO).

Baada ya kuibuka na ushindi huo, Miyeyusho alikabidhiwa Ngao ya Amani ya Afrika Mashariki na Mhariri Kiongozi wa Championi, Saleh Ally.

MASHALI AMKALISHA MKENYA.

Pambano la mwisho la raundi sita, lilikuwa ni kati ya Mkenya Patrick Amote aliyerushiana mawe ya ukweli na Mtanzania Thomas Mashali.

Licha ya ukali wa Mashali, Mkenya Amote aliweza kustahimili mno lakini mwisho katika raundi ya sita, Mashali alimkalisha Amote kwa KO na kufanya ngao ya pili ya Amani ibaki Bongo.

MUZIKI.

Uwanja wa burudani ya muziki ulifunguliwa na msanii chipukizi, Ommy aliyelianzisha na wimbo wake mpya wa My Number One.

Baada ya hapo, Hamis Ramadhan ‘H. Baba’ alipanda stejini na kuamsha shangwe za nguvu kutokana na umahiri mkubwa aliouonesha wa kukata mauno sambamba na wacheza shoo wake.

WANAUME FAMILY.

TMK Wanaume Family walipopanda jukwaani baada ya H. Baba kumaliza, uwanja mzima ulilipuka kwa shangwe za kufa mtu.

Chegge na Temba walifanya makamuzi ya nguvu kwa nyimbo kali kama Nampenda Yeye, Dar Mpaka Moro na nyingine kibao huku wakionesha uwezo mkubwa wa kuyarudi mapanga shaa!

PREZOO, DIAMOND WEE ACHA TU.

Baada ya TMK Wanaume Family, mkali kutoka 254, Nairobi nchini Kenya, Jackson Makini ‘Prezzo’ alikwea jukwaani kwa staili ya aina yake, jukwaa likawaka moto wakati mchizi alipowakilisha nchi yake.

Prezzo akiwa kwa steji na Nelly Kamwelu.

Cash Money Brother huyo akiwa amechafuka na mikufu kibao ya dhahabu aliendelea kumwaga makamuzi ya nguvu huku uwanja mzima ukimshangilia kwa nguvu.

DIAMOND STEJINI.

Mgenge Prezzo alipomaliza Shoo kali, Rais wa Wasafi, Nasibu Abdul ‘Diamond’ alijitupa jukwaani kwa mbwembwe za hali ya juu akiwa sambamba na wacheza shoo wake na kusababisha watu washindwe kukaa kwenye viti vyao, kila mmoja akawa anajiachia kivyake na swaga za Platnumz.

Diamond akiwachizisha mashabiki kwa wimbo wake 'Ukimwona'.

Ngoma kali kama Ukimwona, Nimpende Nani... ziliwabamba kinomanoma maelfu ya watu waliokuwa wamefurika uwanjani.

HISTORIA IMEANDIKWA!

Watu wa kada mbalimbali wakiwemo viongozi wa serikali na wanasiasa walikiri kuwa tamasha hilo limeandika historia ambayo haijawahi kutokea, jambo ambalo hata JK alilikiri.

Waziri wa Habari, Vijana, Utamaduni na Michezo Dkt Fenella Mukangara akimkaribisha JK kutoa hotuba yake katika Tamasha la Usiku wa Matumaini 2013 ,lililofanyika uwanja wa Taifa jana (Julai 07,2013) .