Rais Magufuli aongoza mazishi ya Marehemu Kingunge.

Rais John Magufuli akiweka taji la maua katika mazishi ya komredi Kingunge Ngombale Mwiru.

 Rais  John Magufuli ameongoza waombolezaji katika mazishi ya Mwanasiasa Mkongwe nchini Kingunge Ngombale Mwiru aliyezikwa kwenye makaburi ya Kinondoni Jijini Dar Es Salaam shughuli iliyotanguliwa na ibada iliyofanyika nyumbani kwake kabla ya kuagwa Kitaifa katika Viwanja vya Karimjee.

 Kingunge alikutwa na umauti Siku ya Ijumaa akiwa anaendelea kupatiwa matibabu katika Hospital ya Taifa ya Muhimbili baada ya kushambiliwa na mbwa nyumbani kwake mwezi uliopita jijini, Dar es Salaam.

Shughuli ya kuaga mwili wa Kingunge iliongozwa na Makamu wa Rais, Samia Suluhu Hassan na kuhudhuriwa na Marais Watatu Wastaafu pamoja na viongozi wengine wastaafu wakiwemo mawaziri wakuu na viongozi wa vyama mbalimbali.

Wasifu wa Marehemu Kingunge ulisomwa huku Serikali nayo ikitoa salamu zake kupitia kwa Waziri wa TAMISEMI, Selemani Jafo bila kusahau Baraza la Vyama Vya Siasa likiwakilishwa na Mwenyekiti wake, John Shibuda.