FAHAMU SASA:-Washindi wa Ligi Kuu Tanzania Bara 2015/2016 Watakavyobeba Zawadi..‘CHAFUKA’ PESA.

Wawakilishi wa Simon Msuva wakipokea tuzo ya mchezaji bora wa VPL msimu uliopita iliyonyakuliwa na nyota huyo wa Yanga SC kwenye sherehe za ugawaji tuzo za VPL msimu uliopita (2014-2015).

Na Baraka Mbolembolea

Ligi Kuu ya Soka Tanzania Bara (VPL) 2015/2016 itafikia mwisho wikendi ijayo kwa timu zote 16 kucheza game zao za 30. 

 Mechi nane zitapigwa wikendi hii ili kukamilisha mzunguko wa 29.  Jumamosi May 14,2016,itachezwa michezo miwili (JKT Mgambo v JKT Ruvu na Ndanda SC v Yanga SC).

Tayari Bingwa wa msimu huu amekwisha fahamika ( Yanga SC ) ambao watakabidhiwa kombe lao May 14,2016 na Waziri wa Kilimo,Mifugo na Uvuvi,Mhe Mwigulu Nchemba. 

Hapa nakuletea thamani ya zawadi mbalimbali ambazo wadhamini wakuu wa ligi hiyo kampuni ya simu za mikononi ya Vodacom watazitoa kwa washindi.

BINGWA KULAMBA TSH. 81 MIL

Yanga SC itaingiza zaidi ya milioni 81 katika akaunti yao kutokana na kutwaa kwao taji hilo.

MSHINDI WA PILI

Mshindi wa pili katika ligi hiyo anataraji kuvuna kiasi cha milioni 40. Nafasi hii hadi sasa inawaniwa na timu za Azam FC na Simba SC.

MSHINDI WA TATU

Timu itakayomaliza nafasi ya tatu yenyewe itafanikiwa kujipatia kiasi cha milion 29.

MSHINDI WA NNE

Mtibwa Sugar ikiwa itamaliza katika nafasi ya nne waliyopo kabla ya game mbili za mwisho inaweza kupata milioni 23 kama zawadi ya mshindi wa nafasi hiyo.

MFUNGAJI BORA

Mrundi, Amis Tambwe anasaka tuzo yake ya pili ya ufungaji bora katika VPL. Akiwa amekwishafunga jumla ya magoli 21 hadi sasa, mfungaji huyo bora wa msimu wa 2013/2014 anaweza kujiingizia kiasi cha milioni 5.4 kama zawadi ya mfungaji bora.

MCHEZAJI BORA WA LIGI

Mshindi wa tuzo hii msimu uliopita ni kiungo mshambulizi wa Yanga SC, Saimon Msuva. Unajua mchezaji bora wa msimu atavuna kiasi gani? Ni kiasi cha milioni 5.4.

GOLIKIPA BORA

Kama ilivyo kwa mfungaji bora na mchezaji bora wa msimu, tuzo ya kipa bora pia itaambatana na zawadi ya milioni 5.4.

TIMU YENYE NIDHAMU

Klabu yenye kadi chache na iliyoonyesha uungwana kwa msimu mzima itazawadiwa kiasi cha milion 17.

KOCHA BORA

Tuzo hii ilizua maneno mengi msimu uliopita baada ya Mbwana Makatta aliyekuwa ameisimamia Kagera Sugar kutangazwa mshindi licha ya kwamba alikuwa katika msimu kwa game nane tu. 

Tuzo ya kocha bora itaendana na zawadi ya milioni 8.

MWAMUZI BORA

Mwamuzi atakayekuwa amefanya vizuri kwa msimu mzima atazawadiwa tuzo na kiasi cha milioni 8 pesa taslim.