Kutoka Viwanja Vya Leaders Club Mwili wa Albert Mangwea Ukiwa Tayari kwa Kuagwa na Ndugu na Jamaa.

Gari iliyobeba mwili wa Albert Mangwea ikisukumwa na washabiki,wapenzi ndugu jamaa na marafiki Kutoka Viwanja Vya Leaders Club Mwili wa Albert Mangwea Ukiwa Tayari kwa Kuagwa na Ndugu na Jamaa,Mungu ailaze roho ya marehemu mahali pema peponi—Amen.

Marehemu Ngwear alizaliwa Novemba 16 mwaka 1982 huko Mbeya, huku asili yake ikiwa ni Mkoa wa Ruvuma akiwa mtoto wa mwisho katika familia yao.

Vilio na sura za huzuni bado vinatawala katika Msiba wa mkali wa ‘freestyle’ Albert Mangwea, mara baada ya kuwasili jana(Juni 04,2013)mchana katika Uwanja wa Ndege Terminal One, ukitokea Afrika Kusini Jumanne ya wiki iliyopita.

Mwili huo ulikuja na ndege ya shirika la Afrika Kusini, ambapo ilitua majira ya saa 7.30 mchana jana.

Mara baada ya mwili kutolewa na kupakiwa kwenye gari maalumu lililowekwa kwa ajili hiyo, mashabiki walianza kuimba nyimbo mbalimbali kuonyesha ishara ya kuukubali mchango wa msanii huyo, ambaye kifo chake kimepokewa kwa masikitiko makubwa.

Msanii Khalid Mohamed, maarufu kama ‘TID’, alisema kifo cha Ngwear kitaendelea kuwa pigo kubwa katika tasnia ya muziki wa kizazi kipya, maarufu kama Bongo Fleva.

“Bado siamini kabisa kuwa msanii mwenzetu ametutoka na tumekuja kuupokea mwili wake hapa, ukizingatia kuwa tulifanya naye kazi kwa ushirikiano mkubwa na kuipigania sanaa yetu,” alisema TID.

Mwimbaji wa wimbo wa Kazi Yake Mola, ambao umetumika sana katika vituo vya redio kuomboleza msiba wa Ngwear, Ahmad Ally ‘Madee’, alisema Mangwea ni msanii aliyekuwa na mvuto kwa kila mtu, hasa uwezo wake wa kughani na kuishi kwa upendo na kila mtu.

“Nimewahi kusikia malumbano mengi ya wasanii yakiwamo ‘mabeef’ makubwa, lakini sijawahi kuona mgogoro mzito unaomuhusisha Ngwear na watu wengine, hivyo inaonyesha moyo wake wa upendo kwa kila mmoja wetu,” alisema Madee, ambaye pia ni Rais wa kundi la Tip Top Connection, lenye maskani yake Manzese jijini Dar es Salaam.

Mfalme mwingine wa muziki wa Hip Hop, Joseph Haule, maarufu kama Profesa Jay, alieleza Ngwear ameacha pengo kubwa katika sanaa, hivyo wasanii wote wafuate nyayo zake na kumuombea marehemu akapumzike kwa amani.

“Sina la kusema, isipokuwa uchungu mkali kuendelea kuwa moyoni mwangu, Ngwear hakika ni moja ya wasanii nyota hapa Tanzania, hivyo kifo chake ni pigo kwetu,” alisema Jay.

Kuhusu taratibu za kuagwa, mwili wa Ngwea utaagwa leo(Jumi 05,2013)  kuanzia saa mbili asubuhi hadi saa sita mchana katika Viwanja vya Leaders Club, ambapo baada ya kumalizika shughuli hiyo, safari ya kuelekea mkoani Morogoro itaanza mara moja.

Rais wa Shirikisho la Muziki Tanzania, ambao wamefanya kazi kubwa, Addo Novemba, alisema Ngwear atazikwa kesho (Juni 06,2013) Kihonda mkoani Morogoro majira ya saa saba mchana.

“Tutamzika Ngwea Kihonda Morogoro siku ya Alhamisi, baada ya kuwapa nafasi wadau wa Dar es Salaam kumuaga Leaders Club, kwani msanii huyu aliishi kwa upendo na watu wote,” alisema.

Marehemu Ngwear alizaliwa Novemba 16 mwaka 1982 huko Mbeya, huku asili yake ikiwa ni Mkoa wa Ruvuma akiwa mtoto wa mwisho katika familia yao.

Ngwea alitambulika katika sanaa ya muziki wa Bongo Fleva, hasa baada ya wimbo wake wa Ghetto Langu kupokewa kwa shangwe na mashabiki wake, akitoa nyimbo nyingine nzuri, kama vile Mikasi, Mimi, She Got a Gwan, Speed 120, CNN na nyinginezo.