UCHAGUZI UMEYA WA JIJI:-UKAWA washtukia njama wapeleka nyaraka Polisi.

Naibu Katibu Mkuu CHADEMA Zanzibar Salum Mwalimu akizungumza mbele ya vyombo vya habari na wanachama wa UKAWA waliojitokeza katika ukumbi wa mikutano wa Karimjee uliopo jijini Dar es Salaam, ambapo walitoa matamko kadhaa kupinga hatua ya jiji kusitisha uchaguzi wa kumsaka Meya wa jiji la Dar es Salaam kusogeza mbele bila kutaja sababu za msingi. 

Wengine ni wajumbe halali wanaopiga kura kwenye uchaguzi huo wakiwemo Madiwani na wabunge wa Manispaa za Ilala, Temeke na Kinondoni.

Naibu Katibu Mkuu CHADEMA Zanzibar Salum Mwalimu  akionesha nyaraka ambazo zinadaiwa  kufanyiwa ‘fojali’ zilizoelezea kuwa zinatoka tume. Hata hivyo UKAWA wameeleza kuwa nyaraka hizo wanataraajia kuziwasilisha Jeshi la Polisi kwani kuna baadhi ya vitu vimefojiwa huku vikibainisha kuwa vinatoka Tume hiyo ya Taifa ya Uchaguzi.

Mstahiki Meya wa Kinondoni, Boniface Jacob akisalimiana na Mstahiki Meya wa Ilala, Charles Koyeko. (Picha zote na Andrew Chale, Modewjiblog).

HALMASHAURI ya jiji la Dar es Salaam imeahirisha uchaguzi wa meya wa Jiji uliokuwa ufanyike leo,January 23, 2016 mpaka hapo tarehe itakapotangazwa baadaye.

Mkuu wa Kitengo cha Itifaki na Uhusiano na Umma wa Jiji, Gaston Makwembe alisema uchaguzi huo uliokuwa ufanyike leo saa nne asubuhi katika ukumbi wa Mmikutano wa Karimjee, umeahirishwa.

Alisema tarehe ya uchaguzi huo itapangwa baadaye na taarifa zitatolewa kwa wananchi kupitia vyombo vya habari bila kueleza sababu ya kuahirishwa kwa uchaguzi huo.

Uchaguzi huo unatarajiwa kuwa na mvutano wa aina yake kati ya vyama vinavyounda na Umoja wa Katiba ya Wananchi (UKAWA) pamoja na Chama Cha Mapinduzi (CCM).

Diwani wa Kata ya Vijibweni, Isaya Mwita (CHADEMA) ndiye atapeperusha bendera ya UKAWA huku mgombea wa nafasi ya Naibu Meya akitarajiwa kutoka CUF. 

Chama Cha Mapinduzi (CCM ) wakiwakilishwa na Diwani wa Kinondoni, Yusuph Omary Yenga.

Inaelezwa kuwa UKAWA wanapewa nafasi kubwa ya kushinda kiti hicho kutokana na kuwa na idadi kubwa ya madiwani ambapo wanaizidi CCM kwa jumla ya madiwani 13.

Ikiwa UKAWA watafanikiwa kutwaa jiji hilo, itakuwa ni mara ya kwanza katika historia ya Tanzania kwa wapinzani kuliongoza tangu kuasisiwa kwa mfumo wa vyama vingi nchini mwaka 1992.

Awali, Ofisa Habari wa Chadema, Tumaini Makene, alitoa mwito kwa Ofisi ya Rais Tawala za Mikoa na Serikali za Mitaa (TAMISEMI) kusimamia uchaguzi huo kwa amani na haki ili usifanyike kama wa kumtafuta meya wa Ilala na Kinondoni uliokuwa na mizengwe mingi.

Papo kwa Papo >>>> Pata Picha, Habari za  Siasa, Kijamii, Biashara, Muziki na Michezo na Nyingine kwa kujiunga  na mimi hapa…..FACEBOOK , TWITTER , INSTAGRAM , Pia tutumie tukio la Picha kwa WhatsApp +255789925630 .