SOMA:- Bajeti ya Serikali za Jumuiya ya Africa Mashariki kwa Mwaka wa Fedha 2014/2015 na Matarajio ya Wananchi ni bei kupanda au kushuka..???

Watanzania leo (June 12,2014)  wanaelekeza macho na masikio yao mjini Dodoma, kusikiliza Hotuba ya Bajeti ya Serikali, inayotarajiwa kusomwa saa 10 kamili Bungeni na Waziri wa Fedha, Saada Mkuya Salum.

Tayari Waziri Saada alishaeleza kuwa makadirio ya Bajeti ya Serikali kwa mwaka wa fedha wa 2014/15, unaoanza Julai mwaka huu, yatakuwa Sh trilioni 19.6 kutoka makadirio ya Sh trilioni 18.2 ya Bajeti inayoisha muda wake ya 2013/2014.
 

Vipaumbele vya Bajeti hiyo, kwa maana ya miradi itakayozingatiwa zaidi, ni iliyo katika Mpango wa Matokeo Makubwa Sasa (BRN) unaohusisha sekta sita za Kilimo, Elimu, Maji, Utafutaji rasilimali fedha, Nishati, Uchukuzi na Uboreshaji wa Mazingira ya kufanyia biashara na Mpango wa Maendeleo ya Miaka Mitano.

Kwa upande wa Kenya, hotuba ya Bajeti ya Serikali ya Kenya, itasomwa na Waziri wa Fedha, Henry Rotich. 

Katika taarifa yake kwa wabunge wa Kenya mwezi Machi mwaka huu, Rotich alieleza kuwa Bajeti ya Kenya kwa mwaka wa Fedha wa 2014/15, itakuwa Shilingi za Kenya Trilioni 1.8.

Waziri wa Fedha wa Uganda, Maria Kiwanuka ndiye atakayesoma hotuba ya Bajeti ya Serikali ya Uganda kwa mwaka wa fedha 2014/15.

Wazir Kiwanuka ataeleza hatua mbalimbali za kuinua uchumi, kupunguza kodi mbalimbali na kudhibiti mfumko wa bei. 

Hivi karibuni, Kiwanuka alikaririwa akisema kuwa uchumi wa Uganda unaendelea kukua kwa kasi, lakini siyo katika viwango vya miaka 1990 na 2000, ambapo ulikua kwa asilimia 7.

Kwa upande wa Rwanda, hotuba ya Bajeti ya Serikali itasomwa na Waziri wa Fedha na Mipango ya Uchumi wa Rwanda, Claver Gatete. 

Bajeti yote ya Rwanda kwa mwaka 2014/15 inatarajia kuwa Faranga za Rwanda bilioni 1,753.

Kwa mujibu wa Shirika la Fedha Duniani (IMF), uchumi wa Rwanda unatarajia kukua kwa asilimia 6 katika mwaka wa fedha 2014/15, ukilinganisha na asilimia 4.6 mwaka 2013.

 Waziri wa Fedha, Mipango ya Uchumi na Maendeleo wa Burundi, Tabu Abdallah Manirakiza, ndiye atasoma bajeti ya Serikali ya Burundi kwa mwaka wa fedha 2014/15. 

Tayari Shirika la Fedha Duniani (IMF) limekadiria kuwa uchumi wa Burundi, utakua kwa asilimia 7 katika mwaka 2014/15, ukilinganisha na asilimia 4.5 mwaka 2013.