''..........Kumng’oa Dk Amani: Kutaleta amani Manispaa ya Bukoba?

Tuhuma zilizoibuliwa na mbunge wa Bukoba mjini, Balozi Khamis Kagasheki dhidi ya Meya wa Manispaa ya Bukoba, Dk Anatory Amani zimehitimishwa kwa mlalamikaji kupata ushindi na mtuhumiwa kutiwa ‘hatiani’ na taarifa ya Mkaguzi na Mdhibiti Mkuu wa Fedha za Serikali (CAG)....Na Phinias Bashaya-Mwananchi.

Na Phinias Bashaya-Mwananchi.

Pambano hili linafanana na msemo wa panya waliosafiri katika boti la muhogo ambao kwa ujinga wao walianza kutafuna kifaa walichopanda. Kilichofuata ni ukoo mzima wa kizazi cha panya kuzama na kuangamia.

Vigogo hawa wawili walikuwa na ndoto moja juu ya maendeleo ya mji wa Bukoba lakini baadaye wakatofautiana katika utekelezaji wa miradi ya manispaa.

Balozi Kagasheki alilalamika jukwaani akidai anaogopa kuumbuliwa na Dk Willbrod Slaa siku akinusa ufisadi katika eneo lake.

Wote walitumia madiwani na wapambe wengine kujenga makundi ya uhasama ili kuwasaidia kusukuma ajenda zao.

Kabla ya ripoti ya CAG, Kagasheki alionekana kama mwanasiasa mwoga anayetafuta huruma ya wapigakura, kwa kutozoea ushindi usio na shaka.

Wapo waliomwona Dk Amani kama mwanasiasa aliyeficha makucha yake na asiyeaminika, ambaye yuko tayari kufa na tai shingoni akitetea anachokiamini hata kama kwa kufanya hivyo kungewaumiza wengine

Makovu ya mgogoro.

Bila kujali ushindi alioupata Kagasheki baada ya CAG kuthibitisha madai yake dhidi ya meya na hatimaye Dk Amani kujiuzulu, mgogoro wao umeacha athari kubwa za kiuchumi na kijamii kwa wananchi wa Bukoba.

Hata hivyo, Kagasheki ambaye inawezekana mvuto wake kwa wananchi umeongezeka, atalazimika kujipa muda akisubiri kupima ‘Matokeo Makubwa Sasa’ ya ushindi wake kama yatasomeka kwenye sanduku la kura.

Baada ya mgomo wa madiwani kususia vikao kama njia ya kushinikiza kung’olewa kwa meya wao, huduma muhimu za wananchi ambazo upatikanaji wake ulitegemea baraka za Baraza la Madiwani ziliathirika kwa kiwango kikubwa.

Madiwani waliona bora kususia vikao kuliko aibu ya kukaa na mtuhumiwa kujadili bajeti ya kununua dawa kwa ajili ya wapiga kura wao wanaohitaji tiba katika vituo vya Rwamishenye, Zamuzamu na Kashai.

Manispaa haikuwa tena na watia saini wa kuhidhinisha malipo baada ya wale wa zamani muda wao kumalizika. Hivyo isingeweza kuchukua fedha za kununua dawa kwa ajili ya vituo vyake, achilia mbali huduma nyingine zilizokwama.

Kwa hali ilivyokuwa, huwezi kupuuza uwezekano wa watoto kupoteza maisha baada ya kudorora kwa huduma za afya kutokana na mgomo wa madiwani.

Wapo wawekezaji waliojengewa hofu na kufuta mipango ya uwekezaji katika mji wa Bukoba ambapo waombaji saba wamekwama kupata vibali vya ujenzi kwa zaidi ya mwaka mmoja.

Kwa mujibu wa Ofisa Maendeleo ya Jamii, Kitengo cha Vijana, Murshid Issa, mikopo kwa ajili ya vijana imekwama kwa kuwa vikao vya madiwani vyenye mamlaka ya kujadili na kupitisha suala hilo havifanyiki.

Mwenyekiti wa mtaa wa Kalelabana, Imelda Kyaishozi anasema madiwani ambao ni wawakilishi wa wananchi wamepoteza fursa muhimu ambayo ingetumika kuwainua vijana,  huku Respicius Muchunguzi kutoka Mtaa wa Kafuti  akitaka yafanyike maandamano kulaani ukatili huo dhidi ya vijana.

Katika pambano hili ilikuwa ni lazima mshindi apatikane hata kwa gharama ya damu ya wapiga kura.

Utawala bora.

Kwa wagonjwa waliokosa huduma na hata wengine kupoteza maisha, kwao madiwani sio lolote zaidi ya malaika waliobadilika kuwa shetani.

Katika mgogoro huo wananchi wa Kata ya Nyanga wamepoteza mradi wa maji kutoka serikalini kwa ufadhili wa Benki ya Dunia baada ya diwani wao kutumia muda mwingi katika malumbano kuliko kuhamaisha uchangiaji wa Sh6 milioni kama nguvu ya jamii ili wapate mradi huo.

Taarifa ya CAG iliwaumbua kwa kuweka wazi kuwa wananchi wa Kata ya Nyanga hawana haki ya kulalamikia Kata ya Kagondo waliokamilisha sharti muhimu la mchango wa jamii na kupewa mradi huo, bali wanatakiwa kujililia wenyewe.

Ni dharau na kuwakejeli wananchi kuwaeleza kuwa Benki ya Dunia imefuta ufadhili wake wa kiasi cha Sh18.5 bilioni kwa kuwa Manispaa ilishindwa kukamilisha kigezo muhimu cha  kuwapo mihtasari ya vikao vya Baraza la Madiwani.

Kwenye macho ya wafadhili hali hiyo ilitafsili kutokuwapo kwa utawala bora kwenye Manispaa ya Bukoba.

Kutokana na hilo, barabara za manispaa  zitaendelea kuwa na mahandaki na busara ya madiwani iliwaonyesha eti bora kukosa kiasi hicho kuliko kikao kuendeshwa na mtuhumiwa.

Kwa mujibu wa CAG, Manispaa ya Bukoba kwa miaka miwili ya mgogoro imepoteza kiasi cha zaidi ya Shilingi 250 milioni kutokana na kutokusanywa kwa ushuru sokoni, ingawa mkaguzi mkuu huyo hakujua kuwa idadi kubwa ya madiwani wanamiliki vibanda kinyemela katika soko hilo, hivyo wamenufaika wenyewe kwa kutokusanywa ushuru huo.

Ufa kwenye chama.

Kwa vyovyote vile makundi yenye uhasama yanaendelea kuweka ufa na kutoaminiana kwenye chama kuanzia ngazi ya wilaya hadi mkoa kutokana na ukweli kuwa ngazi hizo zimeshiriki kutafuta suluhu bila mafanikio.

Hatua ya Kamati Kuu ya CCM kutengua uamuzi wa kuwafukuza madiwani ‘waasi’ waliodaiwa kuungwa mkono na Balozi Kagasheki unaongeza mashaka ya makundi hayo kuongea lugha moja ya chama, baada ya kung’oka kwa Dk Amani.

Wanachama waliokunywa maji ya bendera wanaamini kwamba pamoja na ukweli wa tuhuma za Kagasheki dhidi ya Meya, bado mbunge huyo ameshiriki kukiumiza chama na ukweli uko wazi kuwa amepoteza baadhi ya viongozi waliomuunga mkono.

Hawa wanaamini chama chao hakina utaratibu wa kulalamika majukwaani kama vyama vingine, bali kinatakiwa kupelekewa taarifa kupitia vikao halali na hatimaye hatua kuchukuliwa kwa kuwa kinamiliki dola.

Hata hivyo, kundi jingine linamuona Kagasheki kama nguzo ya chama ambaye yuko tayari kutofautiana na kiongozi yeyote hata kama hatua hiyo itamgharimu.

Hii ndiyo sababu ya kuwatuhumu hadharani viongozi wenzake majukwaani bila kujali matokeo yake.

Vilevile baada ya kumdhoofisha Dk Amani kupitia taarifa ya CAG, hata kama hakuwahi kutangaza kukitamani kiti cha ubunge, Kagasheki anaweza kupata mpinzani mpya atakayetishia nafasi yake ya ubunge kwa kutegemea kuungwa mkono na wapambe wa Dk Amani.

Pengine mtihani mkubwa kwa CCM ni jinsi ya kuwashawishi wapigakura wa Bukoba hadi ipate sababu ya kuaminika.

Kutokana na mgogoro huu kuna uwezekano mkubwa wa ahadi walizotoa kutokamilika kabla ya uchaguzi mkuu.

Wakati wa uchaguzi mkuu hakuna mwananchi atakayehangaika kujikumbusha jinsi Mkaguzi Mkuu na Serikali walivyoshughulikia watuhumiwa wa ubadhilifu wa miradi bali watahoji hesabu ya  yale waliyohaidi kutekeleza.

Kwa jinsi taswira ya Baraza la Madiwani ilivyo hakutakuwa na mawazo mapya yatakayoibuliwa, na idadi kubwa ya madiwani hawana la kupoteza kutokana na ukweli kuwa wengi wao hata kwa kukosea hawawezi kuchukua fomu ya kutetea nafasi zao.