TASWIRA:-Mafuriko mkoani Morogoro, Rais aamuru Jeshi kusimamia utoaji huduma kwa waathirika wa mafuriko hayo.

Rais Dkt. Jakaya Mrisho Kikwete akikagua Daraja la Mto Mkundi mkoani Morogoro linalokarabatiwa baada ya kuharibiwa na mafuriko hivi karibuni.Rais Kikwete alitembelea eneo hilo na sehemu nyingine zilizokumbwa na mafuriko hayo kujionea uharibifu. Picha na Freddy Maro wa Ikulu.

Helkopta iliyokuja na Rais Kikwete ikitua eneo la daraja la Dumila mkoani Morogoro jana (Januari 27,2014)  ili kukagua daraja hilo lililoharibiwa na mvua pamoja na kuongea na wananchi wa eneo hilo waliokumbwa na mafuriko yaliyotokea Januari 22, mwaka huu wilayani Mvomero, Morogoro.

Rais JK akielekea kukagua daraja la Dumila lililokatika kutokana na mvua kubwa iliyonyesha eneo hilo Januari 22, mwaka huu wilayani Mvomero, Morogoro.

Rais Kikwete akikagua daraja hilo jana (Januari 27,2014)  , daraja hilo lililoharibiwa na mvua pamoja na wananchi wa eneo hilo kukumbwa na mafuriko yaliyotokea Januari 22, mwaka huu wilayani Mvomero, Morogoro.

Rais

wa Jamhuri ya Muungano wa Tanzania na Amiri Jeshi Mkuu wa Majeshi la Ulinzi na

Usalama, Mheshimiwa Jakaya Mrisho Kikwete ameliamuru Jeshi la Wananchi wa

Tanzania (JWTZ) kuanza mara moja kazi ya kusimamia utoaji huduma kwa watu

walioathiriwa na mafuriko katika Mkoa wa Morogoro, ikiwa ni pamoja na kusimamia

ujenzi wa nyumba za muda wa wahanga hao.

Rais

pia ameliamuru Jeshi kupeleka mashine za kusafisha maji katika makambi ambako

wahanga hao wa mafuriko ya Januari 22, mwaka huu wanaishi kwa muda.

Aidha,

Rais Kikwete amewahakikishia wahanga wa mafuriko hayo kuwa Serikali

itahakikisha inawapatia huduma zote za msingi ikiwa ni pamoja na chakula,

malazi, maji na huduma za afya hadi hapo watakapokuwa na uwezo wa kuanza

kujitegemea tena.

Rais

Kikwete ametoa amri hizo kwa Jeshi leo, Januari 27, 2014, wakati alipotembelea

kambi za wahanga wa mafuriko hayo kuwajulia hali walioathirika katika makambi

yaliyoko Shule ya Sekondari ya Magole katika eneo la Dumila na katika Kijiji

cha Mateteni kilichoko Dakawa, Wilaya ya Kilosa.

Katika

hotuba zake fupi baada ya kuwa ametembelea na kuona mahema ambamo wahanga hao

wanalala, Rais Kikwete amesema   ameagiza

Jeshi kuongoza harakati za kuwahudumia wahanga hao kwa sababu zikifuatwa

taratibu za kawaida za Kiserikali huduma zitachelewa sana kuwafia waathirika.

“Kazi

yetu ni kusimamia maisha ya watu hasa

kipindi cha shida za namna hii. Tukifuata taratibu za kawaida za

Kiserikali za tenda tutachelewesha sana huduma za dharura kwa waathirika.

 Ndiyo

maana nimeliamuru Jeshi kufanya kazi hii ikiwa ni pamoja na kujenga haraka

makazi ya muda wa waathirika,” amesema Rais Kikwete na kuongeza:

“Katika

mazungumzo hayo na Mkuu wa Majeshi, nimemwagiza pia kuleta mashine za kusafishia

maji ili kuhakikisha kuwa watu wanakunywa maji salama kwa sababu katika hali ya

sasa maji yasiyokuwa salama yanaweza kuwa chanzo cha magonjwa.”

Kuhusu

upatikanaji wa chakula cha msaada kwa wahanga, Rais Kikwete amesema kuwa

Serikali inacho chakula cha kutosha kwa ajili yao. “Tunacho chakula cha kutosha

na hata kile tusichokuwa nacho tutanunua. Tutabanana ndani ya Serikali ili

tupate fedha za kutosha za kuwahudumia.”

Kuhusu

malazi, Rais amesema:”Naambiwa kuna upungufu wa magodoro. Tutahakikisha kuwa

yanapatikana na yatafika katika siku mbili zijazo. Hatutaki watu walale chini

na waje kupata vichomi.”

                        Kuhusu

maji, Rais Kikwete amesema kuwa Serikali itaendelea kutoa huduma ya maji bure

kwa wahanga. “Tutaendelea kutoa bure huduma hii mpaka hapo huduma ya kawaida ya

maji itakapoanza kupatikana tena.”

Kuhusu

huduma za afya, Rais amesema kuwa anafurahi kuwa kila kambi ya wahanga inayo

huduma ya afya ambayo itaendelea kutolewa kwa kadri watu wanavyozidi kuishi

kwenye makambi.

Rais

ameagiza kuwa baada ya muda mfupi viongozi wa Mkoa wa Morogoro na wilaya husika

wakae chini ya viongozi wa ngazi za chini na wahanga kujadili na kutafuta

mwafaka kuhusu maisha ya baadaye ya wahanga – hasa kuhusu namna gani wanaweza

kupatiwa maeneo yaliyoko nje ya mikondo ya mafuriko.

                        “Hili

ni lazima kwa sababu hata kama imechukua miaka mingi kwa mafuriko ya sasa

kutokea ni dhahiri kuwa iko siku yatakuja tena – inaweza kuwa hata mwaka huu

kwa sababu zipo mvua za masika. Kwa hiyo ni lazima tukubaliane jinsi gani ya

kurudi ama kutokurudi katika maeneo yetu tulikotoka.”