Waziri Mkuu wa Tanzania awataka Watanzania kuzingatia matumizi ya uzazi wa mpango ili kukabiliana na ongezeko la watu.

Bw.Mizengo Pinda
Waziri Mkuu wa Tanzania

Waziri Mkuu wa Tanzania Bw.Mizengo Pinda amewataka Watanzania kuzingatia matumizi ya uzazi wa mpango ili kukabiliana na ongezeko la watu ambalo linatarajiwa kufikia milioni 90 mwaka 2050.

Akizindua ripoti ya idadi ya watu katika ngazi ya taifa, wilaya, kata na shehia, wiki hii  jijini Dar es Salaam, Waziri Pinda alisema ni vyema kuzingatia uzazi wa mpango kama ilivyoainishwa katika sera ya watu ya mwaka 2006.

Alisema ni vyema Watanzania wakaachana na dhana potofu kuwa kuzaa watoto wengi ni umaarufu na utajiri.

Desemba 31, mwaka jana, Rais Jakaya Kikwete alizindua matokeo ya Sensa ya Watu na Makazi kwa mwaka 2012 ambapo idadi ya Watanzania ilifikia milioni 44.9.

Matokeo hayo yalionyesha kuwa wanawake ni asilimia 51 wakati wanaume ni asilimia 49.

Kimkoa, ripoti hiyo ilionyesha mikoa yenye idadi kubwa ya watu kuwa ni Dar es Salaam wenye idadi ya watu Milioni 4,364,541. Mwanza 2, 727, 509 na Mbeya 2,707,410.

Pinda alisema, Serikali itaendelea kushirikiana na wananchi kuhimiza matumizi ya uzazi wa mpango kutokana na athari zinazoweza kujitokeza kutokana na ongezeko la idadi ya watu.

Vilevile Pinda alisema iwapo ongezeko la watu la asilimia 2.7 kwa mwaka litaendelea basi idadi ya watu Tanzania itafikia milioni 90 ifikapo mwaka 2050.

Ripoti hiyo ilionyesha kuwa Mkoa wa Dar es Salaam una ongezeko kubwa la watu kwa asilimia 5.6 kwa mwaka ukifuatiwa na Mkoa wa Mjini Magharibi na Unguja ambapo kasi katika miji hiyo ni asilimia 4.2.

Alisema msongamano wa watu katika miji hiyo ni mkubwa na unasababisha shinikizo katika utoaji wa huduma za maendeleo kama maji, elimu, afya, umeme na miundombinu.