CCM na Pongezi kwa Mbunge wao Salim Hassan Turky Kuonyesha Upendo, Utu na Mshikamano kwa Tundu Lissu.

Chama Cha Mapinduzi (CCM) nchini Tanzania kimempongeza mwanachama wake aliyejitolea kudhamini ndege iliyomsafirisha Mbunge wa Jimbo la Singida Mashariki, Tundu Lissu kwenda jijini Nairobi nchini Kenya kwaajili ya matibabu.

Katika taarifa hiyo, imesema kuwa wamechukua hatua hiyo ya kumpongeza Mbunge wa Jimbo la Mpendae, Salim Hassan Turky kwa kuonyesha upendo, utu na mshikamano na kuweka kando tofauti za kisiasa.

“Kwa dhati kabisa tunampongeza mwanachama wetu na mbunge wa Jimbo la Mpendae, kwa kuonyesha utu na kuweka kando itikadi za kivyama kumsaidia Mbunge wa Singida Mashariki, Tundu Lissu,” amesema Polepole kupitia taarifa hiyo.

Hata hivyo, Polepole ameongeza kuwa wameamua kumpongeza mbunge huyo kwa kuonyesha uzalendo wa hali ya juu, kwani katika matatizo ni vyema itikadi za kisiasa zikawekwa pembeni ili kuweza kutatua kile ambacho kinakuwa kinawakabili.

Aidha Chama cha Mapinduzi(CCM), kuwa wanachama wake na viongozi wa chama hicho wanaendelea kumuombea apone haraka huku ikiitaka Serikali kuwatia nguvuni na kuwachukulia hatua wote waliohusika na tukio la Mbunge wa Singida Mashariki, Tundu Lissu aliyejeruhiwa na risasi Septemba 7,2017 kwa kupigwa risasi eneo la ‘area D’ mjini Dodoma na watu wasiojulikana.