Soma Msukosuko wa Sheikh ponda mpaka kupigwa Risasi mjini Morogoro hapo jana...!

Shekh Ponda akisisistiza jambo mbele ya waumini wa Dini ya Kiislamu kwenye Kongamano , Augosti 10, mwaka huu mjini Morogoro.

Hapa ni Kutambulishwa jukwaani Shekh Ponda.

Askari wa FFU wakijisongeza kati kati ya uwanja mara baada ya muda wa kongamano kumalizika na huu ndio mwanzo wa patashika lililompata Sheikh Ponda.

Shekh Ponda akikaribishwa kwenye jukwaa kuu baada ya kuwasili kwenye viwanja vya shule ya Msingi Kiwanja Cha Ndege , mjini Morogoro hapo jana Agosti 10,2013.

Shekh Ponda akisalimiana na Mhadhiri wa Mihadhara nchini, Ustaadhi Abubakari.

Hali ya wasiwasi imetanda mjini Morogoro baada ya Katibu wa Jumuiya na Taasisi za Kiislamu nchini, Sheikh Ponda Issa Ponda, kudaiwa kupigwa risasi begani wakati polisi wakiwa katika harakati ya kumkamata.

Habari kutoka katika eneo hilo zinadai kuwa Ponda alipigwa risasi saa 12:25 jioni, wakati akisindikizwa na wafuasi wake kuelekea katika Msikiti wa Mungu Mmoja Dini Moja, baada ya kumaliza kutoa mhadhara katika kongamano lilifanyika mjini Morogoro jana(Agosti 10,2013.

Tukio hilo lilitokea katika Barabara ya Tumbaku, baada ya kumalizika kwa mkutano wa kongamano lililoandaliwa na Jumuiya ya Wahadhiri wa Kiislamu Mkoa wa Morogoro.

Mwenyekiti wa Kongamano hilo, Sheikh Idd Mussa Msema aliliambia Mwananchi Jumapili jana kuwa Ponda alipigwa risasi sehemu ya bega, na askari polisi na kwamba aliwahishwa kutibiwa katika Hospitali ya Kiislamu iliyopo eneo Msamvu mjini Morogoro.

Hata hivyo, wakati Sheikh huyo akisema hivyo, Kamanda wa Polisi Mkoa wa Morogoro, Faustine Shilogile alikanusha madai ya kuwa polisi wamempiga risasi.

Alisema polisi walifika katika eneo hilo kwa ajili ya kumkamata Ponda, baada ya kumaliza mhadhara wake na kwamba wakati wakitaka kumkamata ndipo wafuasi wake wakawazuia polisi na kulazimika kupiga mabomu ya machozi na risasi hewani kuwatawanya.

Katika tukio hilo inadaiwa kuwa Sheikh Ponda aliyekuwa katika gari ndogo huku wafuasi wake wakimsindikiza kwa miguu, walipofika eneo la gereji mabomu ya machozi yalipigwa na polisi waliokuwa katika magari aina ya defender wakati wakijaribu kuwatawanya wafuasi hao.

Baada ya tukio hilo baadhi ya wafuasi wake walimchukua Sheikh Ponda kutoka katika gari lake na kumkimbizia katika gereji moja, kisha wakatoka wakiwa wamempakia katika pikipiki na kumpeleka katika Hospitali ya Rufaa ya Morogoro.

Mlinzi mmoja wa lango namba moja alisema kuwa ulifika msululu wa pikipiki zaidi ya 50, lakini pikipiki zote zilizuiliwa isipokuwa iliyokuwa imembeba Sheikh Ponda na kwenda naye mpaka mapokezi.

Aidha, alisema wakiwa katika eneo hilo magari kadhaa ya polisi yaliingia katika lango la hospitali hiyo. Hivyo wafuasi wa Sheikh Ponda wakalazimika kumbeba begani na kutoroka naye kupitia lango namba mbili.

Taarifa zilizopatikana baadaye zinadaiwa kuwa Sheikh Ponda alikimbizwa katika Hospitali ya Kiislamu ya Msamvu.

Baadhi ya watu walidai kumwona Sheikh Ponda akiingizwa katika Hospitali ya Rufaa Morogoro, lakini walishangaa alivyotoweka.

Habari Na:Mwananchi.

 Umati wa waumini wa Kiislamu wakimsikiliza Shekh Ponda.

Waumini wa Dini ya Kiislamu wa mjini Morogoro wakimsikiliza Shekh Ponda.

Waumini wa Kiislamu wakitawanyika uwanjani baada ya muda wa kongamano kufikia tamati.

HAPA CHINI KUNA USHUHUDA WA MDAU ALIYEKUWA ENEO LA TUKIO KAMA ALIVYOUANDIKA KATIKA MTANDAO WA JAMII FORUM:

Kweli nimeshindwa kuamini kilichotokea, Sheikh Ponda kupigwa risasi. Nilikuwepo pale uwanjani tena nilikuja mapema kabisa na hivyo kushuhudia kila kitu kilichotokea.

Kimsingi sikuona sababu ya Sheikh Ponda kutokewa na tukio baya kiasi kile ambacho hakionyeshi ubinaadamu kabisa, utu wetu, uhuru wetu na hata heshima tuliyonayo Watanzania kwenye jumuiya za kimataifa. Mpaka sasa haieleweki ni nani hasa kampiga risasi Sheikh Ponda, lakini minong'ono ya watu wanasema ni polisi wamehusika.

Binafsi pamoja na kufuatilia kwa ukaribu sikuona ilikotokea risasi hata aliyepiga na nilikuwa mbali kidogo na tukio. Ila nilimwona wakati anapandishwa kwenye pikipiki akiwa tayari amekwisha kupigwa risasi. Imewahuzunisha wengi!

Jamaa ameongea kwa muda mfupi sana ni takribani dakika 18, kwani alianza kuongea saa 11:54 na alimaliza kuongea saa 12:12 jioni.

Hali ya uwanjani kwa kweli ilikuwa shwari sana, hata polisi hawakuonekana jirani walikuwa kwa nyuma kabisa huku wakiwa wamejisheheni kwa zana zote za kazi.

Mara baada ya Ponda kukaribia kumaliza kuongea alisema kuwa muda hautoshi isipokuwa alitangaza kuwa kesho baada ya swala ya adhuhuri atakuwa kwenye msikiti wa mkoa wa Morogoro wa Boma Road ambapo ataongea kwa kirefu hivyo kuwataka Waislamu kesho kuhudhuria eneo hilo.

Inavyooneka polisi walipanga wamkamate hata kabla ya kuongea katika ule mkutano na ndiyo maana walitega sehemu kana kwamba walikuwa wakimsubiri aingie wamkate.

Lakini katika hali isiyotarajiwa na wengi, Sheikh Ponda iliingia uwanjani kupitia upande wa pili ambapo msafara wake ulikuwa na gari moja tu na taksi mbayambaya kiasi kwamba wala huwezi kudhania.

 Mara tunashangaa gari imesimaa na Sheikh Ponda na Amiri wa Wahadhiri Tanzania Sheikh Kondo Bungo wakashuka, wakapita kwenye kundi la Waislam kwa nyuma ghafla kivumo cha shangwe na Takbir kikavuma huku umati wa Waislam waliohudhuria hapo ukiitia Allah Akbar, Allah Akbar n.k.

Wakati huo jukwaani alikuwa akiongea Sheikh Said Riko na ndiyo aliyewapokea kwa kuanzisha Takbir ambayo iliitikiwa na Waislam Allahu Akbar, Allah Akbar. Kwa sababu waliingia kwa kuchelewa ilibidi mara moja Sheikh Said Rico ampishe Sheikh Kondo Bungo, Amiri wa wahadhiri Tanzania aongee.

Wakati anaendelea kuongea kabla hata hajamaliza umeme ukakatika, likachukuliwa jenereta ambalo lilikuwa jirani likawashwa, na mhadhara ukaendelea kama kawaida.

Sheikh Kondo Bungo akamaliza mada yake, akarudi Sheikh Said Riko, akaongea na kuchangisha michango kwa ajili ya kuendeleza harakati kwa muda wa kama dakika tano hivi ndipo akaruhusiwa Sheikh Ponda kupanda jukwaani.

Sheikh Ponda mara baada ya kumaliza kuongea, watu wakaanza kutawanyika, lkn ghafla mwendesha shughuli akatangaza waislam wasitawanyike kwanza kwa kuwa kulikuwa na matangazo.

Wakati matangazo yanendelea ambayo sikuweza kuyasikia , ghafla tukaona defenda moja ya polisi inaingia ambayo ilikuwa imejaza polisi walio tayari kwa mapambano. Waislam wakawa wanawashanga kulikoni tena ilhali mkutano ulifanyika na kuisha kwa amani kabisa.

Basi Sheikh Ponda akaingizwa kwenye taxi iliyokuja kumfuata akiambatana na Sheikh Kondo Bonge.

Polisi walitaka kumkamata Sheikh Ponda lakini waumini wakamkinga kwa kulizingira gari alilopanda huku likiondoka taratibu. Huku nyuma gari la polisi likawa linafuata taratibu bila kupiga risasi hewani wala kupiga mabomu ya machozi.

Gari ya polisi ilipofika barabara ya lami maeneo ya karibu na jengo la Fire ilionekana kusimama kwa muda huko gari iliyombeba Sheikh Ponda kukunja kushoto kuelekes kwenye msikiti wa Mungu mmoja dini moja.

Kabla msafara wa Ponda haujafika kokote gari nne za polisi zilikuja kwa kasi sana na kuanza kupiga mabomu ya machozi kuwatawanya waumini, watu walitawanyika na Sheikh Ponda akashuka na kuelekea kwenye gereji moja hivi kabla ya kufika idara ya maji ambako ndiko alikopigwa risasi.

Kwa kweli sijui ilikotokea risasi iliyompiga Ponda, nadhani kamanda wa polisi atalitolea ufafanuzi zaidi. Mimi nimeandika kile nilichoona kwa macho yangu!

Mi nilidhani ingekuwa busara kwa jeshi la polisi kama walimuhitaji Sheikh Ponda wangemwambia anahitajika polisi na hivyo ajisalimishe.

Na Mdau