Watu 8 wa Familia moja wafariki Dunia katika Ajali ya Basi na Noah.

Watu nane wamefariki dunia papo hapo na mmoja amejeruhiwa baada ya gari dogo aina ya Toyota Noah waliyokuwa wakisafiria kutoka Chunya kwenda Jijini Mbeya, kugongana uso kwa uso na basi la kampuni ya Igembesabo katika eneo la Igodima Mbeya.

Ajali hiyo imetokea leo Jumatatu Aprili 9, 2018 mchana ikihusisha Noah yenye namba za usajili T 649 DEA na basi la Igembesabo katika Barabara ya Chunya Mbeya huku chanzo cha ajali hiyo kikiwa hakijulikani.

Kwa mujibu wa Kaimu Kamanda wa Polisi wa Mkoa wa Mbeya, Mussa Tahib ni kwamba ajali hiyo imetokea saa 5:00 asubuhi nakusema kuwa wanafamilia hao waliofariki walikuwa wanawahi mazishi ya ndugu yao jijini Mbeya.

Amesema wanafamilia hao walikuwa tisa na kwamba ni mmoja pekee ambaye alisalimika japo alijeruhiwa na kukimbizwa katika Hospitali ya Kanda ya Rufaa ya Mbeya kwa ajili ya matibabu na hakuna majeruhi wala kifo chochote kwenye basi.