Simba SC yaongeza Pointi Muhimu za Ubingwa VPL 2017/2018.

Emmanuel Okwi alipoifungia Simba bao pekee la ushindi dhidi ya Mtibwa Sugar katika mchezo uliopigwa huku mvua kubwa ikinyesha, katika dimba la Jamhuri, Morogoro.

Mshambuliaji wa Simba SC, Emmanuel Okwi ameifungia timu yake bao pekee la ushindi dhidi ya Mtibwa Sugar katika mchezo wa Ligi Kuu Vodacom Tanzania Bara 2017/2018 ukipigwa katika dimba la Jamhuri, Morogoro April 9, 2018.

Simba SC imeendeleza rekodi yake ya kutopoteza mchezo wowote wa ligi tangu kuanza kwa ligi Agosti 26, 2017.

Ni ushindi ambao unaifanya Simba SC ifikishe pointi 52 katika mechi ya 22 ikiendeleza kuongoza Ligi Kuu kwa pointi sita zaidi ya mabingwa watetezi, Yanga SC wenye pointi 46 za mechi 21, wakati Mtibwa Sugar inabaki katika nafasi ya sita na pointi zake 30 za mechi 22 pia.

Mechi inayofuatia kwa Simba SC itakuwa dhidi ya Wajelajela Mbeya City FC, itakayopigwa kwenye Uwanja wa Taifa jijini Dar es Salaam.